ق ر پرەزيدەنتى قاسىم-جومارت توقايەۆ الماتى وبلىسىنىڭ اكىمى مارات سۇلتانعازييەۆتى قابىلدادى. كزدەسۋدە ايماق باسشىسى مەملەكەت باسشىسىنا الماتى وبلىسىنىڭ الەۋمەتتىك-ەكونوميكالىق دامۋىندا وڭ ديناميكا بار ەكەنىن ايتىپ، ستراتەگيالىق دامۋ جوباسى تۋرالى باياندادى.

اكىمنىڭ ايتۋىنشا الماتى وبلىسىن دامىتۋدىڭ جوسپارى نەگىزىنەن 5 باعىتىنان تۇراتىن قۇجات 2 كەزەڭدى قامتيتىنىن ايتتى. جوسپار بويىنشا ءوڭىردى دامىتۋ قۇجاتى  2025 جىلعا دەيىن جانە 2030 جىلعا دەيىن جۇزەگە اسىرىلماقشى.

الماتى وبلىسىندا تاياۋ ۋاقىتتا ينۆەستيسيانىڭ ءوسىمىن 455 ميلليارد تەڭگەدەن 686،5 ميلليارد تەڭگەگە دەيىن ارتتىرۋ جوسپارلانىپ وتىر. وسى ماقساتتا قۇنى 618 ميلليارد تەڭگە بولاتىن ءارى 7 مىڭنان استام جۇمىس ورنىن اشۋعا مۇمكىندىك بەرەتىن 132 جوبادان تۇراتىن ينۆەستپورتفەل جاساقتالعان.

وبلىس اكىمىنىڭ ايتۋىنشا، الماتى اگلومەراسياسىنىڭ ايماقارالىق جوسپارىنا سايكەس، وبلىستاعى وبەكتىلەر ينجەنەرلىك جانە الەۋمەتتىك ينفراقۇرىلىممەن قامتاماسىز ەتىلەدى.

كەزدەسۋدە ايماقتاعى ەڭ وزەكتى پروبلەمانىڭ ءبىرى – ءۇش اۋىسىمدى مەكتەپتەر ماسەلەسى قالاي شەشىلەتىنى دە ءسوز بولدى. 2025 جىلعا دەيىن «جايلى مەكتەپ» جوباسىمەن 51 مەكتەپ سالۋ جوسپارلانعان. سەبەبى وبلىستا ءۇش اۋىسىمدى مەكتەپتەر كوپ.

سونىمەن قاتار وبلىس جەتەكشى جوعارى وقۋ ورىندارى مەن كوللەدجدەردىڭ فيليالدارى، دارىندى بالالارعا ارنالعان مەكتەپ ليسەي، «G 4 City» اۋماعىندا مەديسينالىق حابى مەن ءعىلىمي-بىلىم بەرۋ ايماعى بار «Gate District» اشىلادى، «ءبىلىمدى ۇلت» ۇلتتىق جوباسىنىڭ اياسىندا 11 كوللەدجدىڭ ماتەريالدىق-تەحنيكالىق بازاسى نىعايتىلادى.

پرەزيدەنتكە ۇسىنىلعان مالىمەتتەرگە سايكەس، وڭىردە 38 مەديسينا نىسانى سالىنادى. وعان قوسا، وبلىس ورتالىعىندا 500 ورىندىق كوپسالالى اۋرۋحانا قۇرىلىسى جوبالانعان.

وبلىس ەكونوميكاسىن دامىتۋدىڭ نەگىزىن قايتا وڭدەۋ سەكتورى، اگروونەركاسىپتىك كەشەن، كولىك، لوگيستيكا جانە تۋريزم قۇراماق. ءوڭىر باسشىسىنىڭ ايتۋىنشا، ءقازىردىڭ وزىندە وبلىستا 2626 جۇمىس ورنىن اشۋعا مۇمكىندىك بەرەتىن قۇنى 290 ميلليارد تەڭگەلىك 23 جوبا ىسكە اسىرىلىپ جاتىر. اگروونەركاسىپ كەشەنى سالاسىندا 3330 جۇمىس ورنىن اشۋعا مۇمكىندىك بەرەتىن قۇنى 210 ميلليارد تەڭگە بولاتىن 78 جوبا جۇزەگە اسىرىلىپ كەلەدى. اوك جوبالارى وبلىستىڭ بارلىق اۋدانىندا قولعا الىنعان. مارات سۇلتانعازييەۆتىڭ ايتۋىنشا، تۋريزم سالاسىندا جەتىستىكتەر بار. الماتى وبلىسىندا ورنالاسقان ۇلتتىق پاركتەرگە كەلەتىندەر سانى كوبەيگەن.

قاسىم-جومارت توقايەۆ كەزدەسۋ سوڭىندا وبلىس دامۋىنىڭ ستراتەگيالىق جوسپارىن ءتيىستى مەملەكەتتىك ورگاندارمەن بىرلەسىپ جۇزەگە اسىرۋدى تاپسىردى.