اباي اتىنداعى قازۇپۋ-دىڭ ۇيىمداستىرۋىمەن، الماتى قالاسى ءماسليحاتىنىڭ دەپۋتاتى، بەلگىلى كاسىپكەر، دۋلات تاستەكەيەۆتىڭ دەمەۋشىلىگىمەن وتكەن بۇل الامان ايتىس بيىل اباي اتىنداعى قازاق ۇلتتىق ۋنيۆەرسيتەتىنىڭ 95 جىلدىعىنا ارنالدى. وسىمەن جەتىنشى مارتە شىمىلدىعىن تۇرگەن جىر دوداسىنا رەسپۋبليكا ايماقتارىنان كەلگەن ءوي-ورىسى كەڭ، تولعاۋى تەرەڭ ازۋلى اقىندارمەن قاتار، الەمنىڭ 4 مەملەكەتىنەن، اتاپ ايتقاندا وزبەكستان، قىرعىزستان، جۇڭگو جانە مونعوليانىڭ ىرىكتەلگەن جۇيرىكتەرى مەن ءسوز ونەرىن ءپىر تۇتاتىن قىرىققا جۋىق دارىندى جاستار قاتىستى.
ءدۇبىرلى دودانى ۋنيۆەرسيتەت باسشىسى دارحان ءبىلالوۆ اشىپ، بارلىق قاتىسۋشىلارعا ساتتىلىك تىلەدى. ول ءوز سوزىندە ايتىسكەرلەردىڭ وراق تىلدىلىگى، وت اۋىزدىلىعى، ءسوز كوركەمدىگى، بىلىمدىلىگى، العىرلىعى، تاپقىرلىعى، تاقىرىپتى اشۋ شەبەرلىگىمەن بىرگە، اباي ۋنيۆەرسيتەتىنىڭ 95 جىلدىق تاريحى، شىعارماشىلىق ءومىرى مەن عىلىمي جەتىستىكتەرى، سونداي-اق جاستاردى ءوز ەلىن سۇيۋدە، ونىڭ وركەندەۋىنە ءوز ۇلەسىن قوسۋدا جانە ۇلتتىق سانا-سەزىمدى قالىپتاستىرۋدا جەتكەن تابىستارى تۋرالى كەڭىنەن كوسىلىپ جىرلاۋ كەرەكتىگىنە توقتالدى. شارا بارىسىندا سويلەگەن ق ر ەڭبەك سىڭىرگەن قايراتكەرى، حالىقارالىق «ايتىس اقىندارى مەن جىرشى-تەرمەشىلەر» وداعىنىڭ باسقاراما ءتوراعاسى، «پاراسات» جانە «قۇرمەت» وردەنىنىڭ يەگەرى ءجۇرسىن ەرمان جىل سايىن وتكىزىلىپ كەلە جاتقان بۇل جاستار ايتىسىنىڭ ماڭىزدىلىعىنا توقتالىپ، بۇل ونەر دوداسىنىڭ جاس ۇرپاقتى تاربيەلەۋدەگى ورنى وتە ۇلكەن ەكەندىگن تىلگە تيەك ەتتى، جاس جۇيرىكتەرگە ءوز باتاسىن بەردى.
الامان دوداعا تۇسەتىن جاس اقىنداردىڭ ايتىسىن اقىن ءجۇرسىن ەرماننان باسقا، ق ر پارلامەنتىنىڭ ءماجىلىس دەپۋتاتى، اقىن رينات زايتوۆ، «الاش» حالىقارالىق ادەبي سايلىعىنىڭ لاۋرەاتى، بەلگىلى اقىن سەرىك قالييەۆ، فيلولوگيا عىلىمدارىنىڭ دوكتورى، پروفەسسور بالتاباي ءابدىعازى ۇلى، ۇلىتاۋ وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى، ايتىسكەر اقىن ءانۋار ومار، ايتىسكەر اقىن، ق ر مادەنيەت سالاسىنىڭ ۇزدىگى قاتارلى ونەر مايتالماندارى قازىلىق جاسادى.
ءىس-شارا بارىسىندا ق ر عىلىم جانە جوعارى ءبىلىم ءمينيسترى ساياسات نۇربەكتىڭ «حالقىمىزدىڭ سان عاسىردان كەلە جاتقان قاسيەتتى ايتىس ونەرىنە دەگەن قۇرمەتى ايرىقشا. بۇل – كەشەگى ءسۇيىنباي مەن جامبىل، ءبىرجان مەن سارا، كەمپىرباي مەن شوجە بابالارىمىزدان قالعان اسىل ونەر. ۇلتتىق بولمىسىمىزدى، قازاقي قۇندىلىعىمىزدى دارىپتەيتىن ايتىس ونەرى تاۋەلسىز ۇرپاقتىڭ ۇلتتىق قازىناسى دەپ بىلەمىن. ءسۇيىنباي بابامىز اتىنداعى جىر دوداسىنىڭ ءداستۇرلى تۇردە ۇيىمداستىرىلۋى، جاستاردىڭ بويىنداعى اقىندىق دارىندى دامىتىپ، سۋىرىپسالما قابلەتىن شىڭداۋعا، اقىندىق مەكتەپتىڭ قالىپتاسۋىنا نەگىز بولاتىن، قازاق رۋحانياتىنا قوسىلاتىن ۇلكەن مۇرا بولاتىنى ءسوزسىز» دەپ اقىندارعا شالقار شابىت تىلەگەن قۇتتىقتاۋ حاتى وقىلدى.
ايتىس ەكى كەزەڭنەن تۇردى. اقتىق كەزەڭگە 18 ايتىسكەر جولداما الدى. ءسويتىپ جىر جەكپە-جەگىندە جەر اپشىسىن قۋىرعان كىل جۇيرىكتەردىڭ ونەرىن كورەرمەن جۇرت ەكى كۇن بويى تامسانا تاماشالادى. ءبارى دە قازاق جوعارى وقۋ ورنىنىڭ قارا شاڭىراعى — اباي اتىنداعى قازۇپۋ-دىڭ وتكەن جولى مەن ۇلتتىق پەداگوگ مامانداردى تاربيەلەۋدەگى ەرەن ىستەرىن تەرمەلەپ، تارام-تارام تاريحىنا تەرەڭ بويلاي ءبىلدى، ۋنيۆەرسيتەت ۇستازدارىنىڭ ۇلاعاتتى ەڭبەكتەرىن بۇگىنگى قوعاممەن بايلانىستىرىپ، ەلدىك مۇددە مەن بەكەم بىرلىكتىڭ باياندى بولۋىن تىلەدى.
قازىلار القاسىنىڭ شەشىمىمەن «مەنىڭ ءپىرىم – ءسۇيىنباي» ءداستۇرلى VII حالىقارالىق جاس اقىندار ايتىسىنىڭ باس جۇلدەسىن كوكشەتاۋدان كەلگەن نۇرماحان جاقىپ يەلەندى. Iء-شى ورىن قازاق ۇلتتىق ونەر ۋنيۆەرسيتەتىنىڭ ستۋدەنتى ايىم اسىلبەكقىزىنا بۇيىرسا، IIء-شى ورىندى قىرعىزستاننان كەلگەن ۇلان توقتوسىنوۆ پەن ت.جۇرگەنوۆ اتىنداعى ونەر اكادەمياسىنىڭ ستۋدەنتى ەرداۋلەت ساردار ەنشىلەدى. ال، IIIء-شى ورىندى باتىرجان كادىرباي، جامبىل ءباقىتالى جانە قۋاندىق كەجەبەك ۇلى ءوزارا ءبولىستى. جالپى، ايتىسقا قاتىسۋشى بارلىق اقىنعا ارنايى جۇلدەلەر مەن اقشالاي سىيلىقتار تابىستالدى.
