مەملەكەت باسشىسى 2025 جىلدى جۇمىسشى ماماندىقتارى جىلى دەپ جاريالادى. وسىعان وراي، بقو وڭىرلىك كوممۋنيكاسيالار قىزمەتىنىڭ ۇيىمداستىرۋىمەن 40 جىل شوپان بولىپ ەڭبەك ەتكەن باتىسقازاقستاندىق سارسەنوۆا باقىتجامال قابدوللاقىزىن 95 جاس مەرەيتويىمەن بقو قوعامدىق دامۋ باسقارماسى باسشىسىنىڭ ورىنباسارى گۇلجانار شوكەيەۆا ارنايى قۇتتىقتاپ، قۇرمەت كورسەتتى.
1930 جىلى 14 قاڭتاردا رەسەيدىڭ روستوۆ وبلىسىندا دۇنيەگە كەلگەن باقىتجامال قابدوللا قىزى جاستايىنان ەڭبەككە ارالاستى. 1946 جىلى سارسەنوۆتەر وتباسى باتىس قازاقستان وبلىسى وردا اۋدانىنىڭ قاراكول شوڭعاي اۋىلىنا قونىس اۋدارىپ، اۋىر كەزەڭدەردە ەلەۋلى ەڭبەك ەتتى. كەيىننەن استراحان وبلىسى احتۋبا اۋدانىنىڭ قىزىل ءۇي اۋىلىنا كوشىپ، 1948 جىلى ناۋشا سارسەنوۆكە تۇرمىسقا شىقتى.
1957 جىلى بيسەن سوۆحوزى قۇرىلعان سوڭ، باقىتجامال قابدوللا قىزى شوپاندىق قىزمەتكە كىرىسىپ، بۇل سالادا 40 جىل بويى ادال ەڭبەك ەتتى. شوپاندىق – شىدامدىلىق پەن قاجىر-قايراتتى قاجەت ەتەتىن قيىن كاسىپ. الايدا باقىتجامال اجە تابيعاتتىڭ ءتۇرلى قيىندىقتارىنا بەيىمدەلىپ، تۋعان جەرىنىڭ وركەندەۋىنە ايانباي ۇلەس قوستى.
«ەڭبەككە ەرتە ارالاستىم. بار جەتىستىگىمنىڭ نەگىزى – ادال ەڭبەك. ەڭبەكپەن شىڭدالعان ادامنىڭ ءومىرى ءارقاشان ماعىنالى. قازىرگى ۇرپاققا دا وسىنى ۇنەمى ايتىپ وتىرامىن» - دەيدى باقىتجامال اجە.
باقىتجامال قابدوللا قىزى – ون بالانىڭ ارداقتى اناسى. ونىڭ 7 ۇلى مەن 3 قىزى بۇگىندە 28 نەمەرە، 61 شوبەرە-شوپشەك ءسۇيىپ، ۇلكەن اۋلەتكە اينالدى. اۋلەتتىڭ ءاربىر مۇشەسى اجەنىڭ ەڭبەكقورلىعى مەن ادامگەرشىلىگىن ومىرلىك ونەگە سانايدى.
«وسىنداي عيبراتتى عۇمىر كەشىپ، تۋعان جەرىنە ادال قىزمەت ەتكەن ادام قاشاندا قۇرمەتكە لايىق. ءسىزدىڭ ءومىر جولىڭىز – بارشاعا ۇلگى. سىڭىرگەن ەڭبەگىڭىزدى ۇرپاق ماقتانىش ەتىپ، دارىپتەيدى» - دەدى مەرەيتوي يەسىن قۇتتىقتاعان گۇلجانار بولات قىزى.
قازاقتىڭ وسىنداي اسىل انالارىنىڭ ارقاسىندا ۇلتتىق قۇندىلىقتارىمىز ءاردايىم ساقتالىپ، ۇرپاقتان-ۇرپاققا جالعاسۋدا. باقىتجامال اجە بۇگىندە بالالارى مەن نەمەرەلەرىنىڭ قامقورلىعىندا، بەيبىت ءومىر ءسۇرىپ، باقىتتى عۇمىر كەشۋدە.
