Memleket basshysy 2025 jyldy Jumysshy mamandyqtary jyly dep jariialady. Osyǵan orai, BQO Óńirlik kommýnikatsiialar qyzmetiniń uiymdastyrýymen 40 jyl shopan bolyp eńbek etken batysqazaqstandyq Sársenova Baqytjamal Qabdollaqyzyn 95 jas mereitoiymen BQO Qoǵamdyq damý basqarmasy basshysynyń orynbasary Gúljanar Shókeeva arnaiy quttyqtap, qurmet kórsetti.
1930 jyly 14 qańtarda Reseidiń Rostov oblysynda dúniege kelgen Baqytjamal Qabdollaqyzy jastaiynan eńbekke aralasty. 1946 jyly Sársenovter otbasy Batys Qazaqstan oblysy Orda aýdanynyń Qarakól Shońǵai aýylyna qonys aýdaryp, aýyr kezeńderde eleýli eńbek etti. Keiinnen Astrahan oblysy Ahtýba aýdanynyń Qyzyl úi aýylyna kóship, 1948 jyly Naýsha Sársenovke turmysqa shyqty.
1957 jyly Bisen sovhozy qurylǵan soń, Baqytjamal Qabdollaqyzy shopandyq qyzmetke kirisip, bul salada 40 jyl boiy adal eńbek etti. Shopandyq – shydamdylyq pen qajyr-qairatty qajet etetin qiyn kásip. Alaida Baqytjamal áje tabiǵattyń túrli qiyndyqtaryna beiimdelip, týǵan jeriniń órkendeýine aianbai úles qosty.
«Eńbekke erte aralastym. Bar jetistigimniń negizi – adal eńbek. Eńbekpen shyńdalǵan adamnyń ómiri árqashan maǵynaly. Qazirgi urpaqqa da osyny únemi aityp otyramyn» - deidi Baqytjamal áje.
Baqytjamal Qabdollaqyzy – on balanyń ardaqty anasy. Onyń 7 uly men 3 qyzy búginde 28 nemere, 61 shóbere-shópshek súiip, úlken áýletke ainaldy. Áýlettiń árbir múshesi ájeniń eńbekqorlyǵy men adamgershiligin ómirlik ónege sanaidy.
«Osyndai ǵibratty ǵumyr keship, týǵan jerine adal qyzmet etken adam qashanda qurmetke laiyq. Sizdiń ómir jolyńyz – barshaǵa úlgi. Sińirgen eńbegińizdi urpaq maqtanysh etip, dáripteidi» - dedi mereitoi iesin quttyqtaǵan Gúljanar Bolatqyzy.
Qazaqtyń osyndai asyl analarynyń arqasynda ulttyq qundylyqtarymyz árdaiym saqtalyp, urpaqtan-urpaqqa jalǵasýda. Baqytjamal áje búginde balalary men nemereleriniń qamqorlyǵynda, beibit ómir súrip, baqytty ǵumyr keshýde.
