Ресейдің сыртқы істер министрі Сергей Лавров мамыр айында Душанбеге барған сапары кезінде Ресей мен Тәжікстан жақын күндері тәжік-ауған шекарасынан жаңа бекет салу жөнінде келісімге келеді деп мәлімдеген. Қаржылай көмекті Мәскеу беретінін айтқан.
Әзірге шекараның қай бөлігіне жаңа бекет салынатыны айтылмаған.
8 шілдеде «Тәлибан» қозғалысының өкілдері Мәскеуде өткізген баспасөз мәслихаты кезінде Ауғанстанның 85% аумағын бақылауға алдық деп мәлімдеген. Бұл делегация ауған-тәжік шекарасына шабуыл жасамаймыз деп уәде берген.
Тәжікстан билігі болса шекарасын қорғау үшін Ұжымдық қауіпсіздік келісім-шарт ұйымынан көмек сұраған.
