Маңғыстау облысы Мұнайлы ауданы Басқұдық ауылындағы "Жібек жолы" балабақшасында тәрбиеші 1,5 жасар баланың қолын бұрап жарақаттаған. Ата-ананың шағымынан кейін комиссия құрылып, тексеріс нәтижесінде тәрбиеші мен күтуші қызметінен босатылды, деп хабарлайды Dalanews.kz. 

Тәрбиешіге ҚР ӘҚБтК-нің 127-бабы бойынша 10 АЕК (39 320 теңге) көлемінде айыппұл салынды. Бүлдіршін басқа балабақшаға ауыстырылды, ал оқиғаға қатысты материалдар құзырлы органдарға жолданды.

Еске салайық, бұған дейін Маңғыстау облысында орналасқан жеке меншік балабақшалардың бірінде тәрбиеші бір жасар бүлдіршінді жұлқып көтергеннен, қолын шығарып алғаны туралы жазған едік. 

Оқиғадан кейін алғашқы медициналық көмек көрсетілмеген. Ал ата-анасы баласының жарақат алғанын үйге келген соң аңғарған.

Бейнебақылау жазбаларынан тәрбиешінің қызды тыныш отырған жерінен жұлқылап, орындыққа отырғызғаны көрінеді. Алайда бала сол сәтте жыламаған. Тек кешкісін үйінде қолының ауыратынын айтып, ата-анасына шағымданған.

Бұған қоса, бейнежазбаны сараптау барысында тәрбиешінің гигиеналық талаптарды өрескел бұзғаны анықталды. Ол бір қасықпен бірнеше балаға сорпа берген, яғни асхана тазалығы сақталмаған. Осы олқылықтардан кейін тәрбиешінің көмекшісі де жұмыстан шеттетілді.

Ал балабақша басшысының айтуынша, бұл кездейсоқ болған жайт.

“Видеода тәрбиешінің тек баланы көтеріп, орнына отырғызғаны ғана көрінеді. Құзырлы органдар да кадрларды қарап шықты, мұнда қасақана зорлық-зомбылық жоқ. Ал тамақ беру мәселесіне келсек, қызметкер ыдыс-аяқты жууды жеңілдету үшін осылай жасаған", - дейді Раушан Аяпбергенова.