Алматыдағы Республика сарайында «Жас қанат – 2023» жас орындаушылар байқауы аяқталды.

Финалда сайыскерлер белгілі композитор, дирижер және өңдеуші Илья Башқатовтың жетекшілігімен тамаша кәсіби Live бэндының сүйемелдеуімен өнер көрсетті. Бұл «Жас қанат» байқауының жаңалығы.

Бір сұхбатында Илья адамдардың жақсы талғамын қалыптастыратын жобаға қатысуға қуанышты екенін айтқан еді. «Байқау жұртшылық арасында жақсы талғам қалыптастыра ма?» деп сұрадық.

«Еш күмәнсіз! Бұл жақсы талғам сіңіретін жоба. Репертуар бойынша конкурстық концерттерге енген әндердің басым бөлігі қатысушылардың өз таңдауы екенін ерекше атап өткім келеді. Бізде орындаушылардың жаңа буыны бар, олар мүлдем басқа. Олармен жұмыс істеу маған үлкен қуаныш сыйлайды. Олар кез келген қажетсіз стилистикалық шеңберден, кейбір клишелерден, форматтардан арылған еркін адамдар. Бірде-бір әлсіз орындаушы өткен жоқ. 20 орындаушының бәрі де өте мықты әншілер. Маған осы жобаға қатысуға ұсыныс түскенде, ол мені қызықтырды. «Азия дауысы» да әдемі жаңғырады деп үміттенемін».

Илья Башкатовтың тобымен сайысқа қатысушылардың барлығы тамаша өнер көрсетті! Еске салайық, екі жарыс күніндегі дауыс беру қорытындысы бойынша ең жоғары ұпай жинаған 8 қатысушы финалға шықты. Айта кету керек, бұл конкурсанттар бірінші жарыс күнінен ақ өздерін танытқан еді. Финалда қазылар алқасының арасында келіспеушіліктер болған жоқ – барлығы бірауыздан кімге қандай орын беру керектігіне келісті.

Сонымен, қазылар алқасының бірауыздан шешімімен байқауда алғаш рет бекітілген Мұрат Ерғалиев пен Александр Пономарев атындағы Гран-при атыраулық Ерназар Жұбанға берілді. «Алтын қанат» (1-орын) ақтөбелік Нарғыз Жанұзақоваға, «Күміс қанат» (2-орын) алматылық Беназир Әлімходжаева, «Қола қанат» (3-орын) алматылық Алмагүл Батталиеваға бұйырды.

Қалған төрт финалист байқаудың дипломанты атанды. Олар – оралдық Аружан Бисембай, петропавлдық Нариман Жолдасбеков, павлодарлық Мәдина Қабдолла және шымкенттік Нұрасыл Сатыбалды.

Қазылар алқасының кейбір мүшелері өз жүлделерін белгіледі. Медеу Арынбаев өз жүлдесін екі қатысушыға – петропавлдық Нариман Жолдасбеков пен оралдық Аружан Бисембайға қазақтың ән дәстүріне бей-жай қарамағаны үшін табыс етті. Ренат Гайсин Нұрасыл Сатыбалдыны өз қанатына алды. Байғали Серкебаев Ерназар Жұбанға өзінің Emporio Music Fest музыкалық фестивалінің арнайы жүлдесін табыс етті. Жүлде - ең танымал Montreux Jazz Festival джаз фестиваліне саяхат. Ол 5-7 шілде аралығында өтеді, оған әлемнің ең танымал музыканттары келеді.

Финалдан тыс қалған «Жас қанат» байқауының 12 қатысушысы диплом-сертификатқа ие болды. Бірақ олар конкурстан тыс керемет ән шырқады. Бәлкім, қазылар алқасы басқа марапаттар тағайындамағанына өкінген де шығар.

Биыл аты аңызға айналған «Азия дауысы» фестивалі қайта жандануда. Оған дайындық барысында еліміздегі ең байырғы оқу орны - Темірбек Жүргенев атындағы Қазақ ұлттық өнер академиясы мен халықаралық «Азия дауысы» фестивалінің басын қосқан қызықты шығармашылық жоба ұйымдастырылды. Жоба – академия студенттері арасындағы сценографиялық байқау. Байқауға қатысушыларға ескі, белгілі стиль мен келбетті сақтай отырып, фестивальдің жаңа стилін ұсыну міндеті қойылды. Айта кету керек, қатысушылар бұл тапсырманы тамаша орындап, комиссия мүшелері бірауыздан екі жеңімпаз болуы керек деген қорытындыға келді. Олар - Дана Нұршаева мен Әлихан Сатыбалды. Олар да сыйлықтармен марапатталып, «Азия дауысы – 2023» сценографиясын жасау үшін шығармашылық топқа шақырылды.

Қорытынды сөзді осы байқаудың дем берушісі, «Азия дауысы» студиясының басшысынан сұрадық. Алматыда «Азия дауысы» мен «Жас қанаттың» қайта тірілуін армандаған Мұрат Ерғалиев пен Александр Пономаревтың оң қолы болған тұлға – Ирина Ковыряко.

"Мен бір нәрсені айта аламын - мен мұны істедім! Бірақ бұл мен үшін өте қиын болды! Байқау басқаша болып шықты, бұрынғылардан айырмашылығы көп", - дейді, Ирина.

"Біріншіден, жанды музыка! Биылғы жылы 60 адамдық нағыз үлкен оркестр қатысты. Екіншіден, Live бэнд болды. Сайыскерлердің керемет өнер көрсеткені сонша, барлығы 2 шілдеде өтетін "Азия дауысы пикнигіне" шақырылды. Енді біз «Жас қанат – 2024» байқауына дайындалып жатырмыз. Қуандым, жыладым, сағыныш көп болды. Сайыскерлер ән салғанда жыладым. Темірлан Төлегенов марқұмдар туралы өзінің жүрекжарды өлеңдерін оқығанда да жыладым. Сахнада болып жатқан оқиғалардың бәрі маған үлкен эмоционалды әсер қалдырды. Ең бастысы, мен Александр Сергеевичтен (Пономарев - Ред.) сөгіс естімедім. Себебі ол маған түсіме еніп, өмірдегідей бұйрық беретін, ұрсатын. Бірақ қазір, жаны көкте жүрген ол қанағаттанған сияқты".

Алматылықтарды «Жас қанат» пен «Азия дауысы» байқауларының қайта оралуымен құттықтаймыз!