Жуырда Жамбыл облысында жантүршіктірер оқиға болды. Марқұмның туыстарының сөзінше, Шу қаласындағы орталық ауруханада дәрігерлер жүкті әйел қайтыс болғанын жасырып, денесін ғимараттың жертөлесіне тастап кеткен. Оның денесін бірнеше күн өткен соң жағымсыз иіс арқылы іздеп жүріп, күйеуі тапқан. Бұл жағдайға қатысты жаңа деректер шықты, – деп хабарлайды Dalanews.kz.
Оқиға наурыздың басында болған еді. Ауруханаға 25 жастағы жүкті келіншек жоғары қан қысымымен және түсік қаупімен түскен. Ресми расталмаған ақпаратқа сүйенсек, ол бірнеше күн бойы комада болып, жүрек-қан тамырлары жеткіліксіздігінен көз жұмған. Марқұмның туыстары аурухана басшылығы бұл жағдайды әдейі жасырып қалуға тырысты деп санайды.
Orda.kz мәліметінше, әйелдің туыстары аурухана ғимаратына келіп, тәртіпсіздік жасаған, кадрларда есік шынысы шағылып, медбикелерге шабуыл жасалғаны байқалады.
Денсаулық сақтау министрлігі тергеу бастады және кінәлі қызметкерлерді жазалауға уәде берді.
Дерекке сүйенсек, аурухана ұжымы бас дәрігерді қызметінен босатуға қарсы наразылық білдіріп жатыр. Олар тергеу кезінде жұмыстан шеттетілген бас дәрігерді қорғап шыққан.
"Ананың өліміне себеп болған кінәлілер соттың шешімі бойынша жазаланады. Ал біз бас дәрігеріміз кәсіби, білікті басшы деп санаймыз. Оған шабуыл жасалып жатыр, соның салдарынан біз төтенше жағдайларда жұмыс істеуге мәжбүрміз. Өрт қоюға және күш қолдануға қатысты дәлелдеріміз бар», - деді дәрігерлер бейне үндеулерінде.
Айта кетейік, бұған дейін фейсбуктегі ірі топтардың бірінде Жамбыл тұрғындары облыс әкімі Ербол Қарашөкеев медицина мәселесіне көп көңіл бөлмейтінін айтып, наразылық білдірген болатын.
"Әкім, қайда қарап отыр? Перзентханаларға камера орнату керек. Аймақтағы елді-мекендер заманауи технологиялардан жұрдаймыз. Медициналық мекемедегі ахуал босануға ыңғайлы болуға тиіс", - деген болатын желі белсенділері.
Артынша ҚР Денсаулық сақтау министрі Ақмарал Әлназарова Жамбыл облысының әкімімен кездесіп, өңірдегі перзентханалардың жұмыс сапасын арттыру мәселесін талқылаған болатын.
Алдағы уақытта Шу қалалық ауруханасының перзентхана бөліміндегі жағдайды жақсарту бойынша нақты шаралар қабылданбақ.
