Мемлекеттік тілдің қолдану аясын кеңейту және оны дамыту, әрі қазақ тілі мен әдебиеті пәндері бойынша дарынды оқушыларды анықтау, қазақ тілінде ән айту, мәнерлеп оқу, ғылыми жұмыс қорғау, шығармашылық қабілетін көрсету арқылы Қазақстанның жарқын болашағы үшін аянбай қызмет ететін жастарға қолдау көрсетуді мақсат тұтқан жобаға жыл сайын 5000-нан астам оқушы қатысады. Жоба басталғалы олардың 160-ы алдыңғы қатарлы ЖОО-да білім алуларына мүмкіндік беретін білім гранттарына ие болды.
Шараны А.Байтұрсынов атындағы Тіл білім институтының директоры Ерден Қажыбек пен Білім-инновация халықаралық қоғамдық қорының президенті Дархан Өте құттықтау сөзбен ашты. Дархан Өте бұл жобаның ерекшелігі, оқыту тіліне қарамастан, мемлекеттік және мемлекеттік емес жалпы білім беретін мектептердің, лицейлердің, гимназиялардың арасында еліміздің барлық облыстарынан келген 7-11 сынып оқушылары өз білімдері мен таланттарын ортаға салып, 5 бағыт бойынша өзара сайысқа түсетінін тілге тиек етті.
«Бұл шараны ұйымдастырудағы басты мақсат – өзге ұлт өкілдерінің мемлекеттік тілге ынтасын арттыра отырып, ұлттық құндылықтарымызды бойына сіңіру» деді Д.Өте.
Биыл да олимпиадаға еліміздің түкпір-түкпірінен 5000-ға жуық оқушы қатысып, солардың 200-ден астамы республикалық кезеңге өтіп, бақ сынады. Жарыс қорытындысы бойынша 1-орынға «Жас ғалымдар» бағыты бойынша Турал Мамедов, Дана Уразова, «Сөз шеберлері» бағыты бойынша Ирина Новицкая, Батырлан Серікбай, «Жазушылар» бағыты бойынша Гүлбахрам Азнибакиева, Бексеит Қадырбай ие болды. Наргиз Ахмедова, Хасан Сидиков «Әнші-бұлбұлдар» бағыты бойынша үздіктер қатарынан көрінсе, «Тілші-әдебиетшілер» бағытынан Дилнора Артикбаева, Дана Ерғалиқызы топ жарды. Жарыс нәтижесі бойынша ең көп жүлдеге ие болған үздік командалар да анықталды. 1-орынды Оңтүстік Қазақстан облысы еншілесе, 2-орын – Алматы қаласына, 3-орын Жамбыл облысына берілді.
«Жарқын болашақ» қазақ тілі олимпиадасының өткізілуіне Сүлеймен Демирел университеті жан-жақты қолдау көрсетіп, арнайы білім гранттарын жыл сайын бөліп келеді. Биыл да дәстүрге айналған бұл үрдіс жалғасын тапты. Сүлеймен Демирел университетінің Бірінші проректоры Салтанат Әмірғалиева барлық қатысушыларды құттықтап, бұл шараның мемлекеттік тілге деген құрметті арттыра түсетінін баса айтты. Сонымен 18 оқушы жоғары оқу орындарының гранттарына ие болды.
Шара барысында Білім және ғылым Министрлігінің және де Білім инновация халықаралық қоғамдық қорының қолдауымен «Білімдіге дүние жарық» атты республикалық жас ақындар айтысының дүлдүлдері Талғат Мықи мен Әсет Дүйсебаев өнерлерін ортаға салды.
