Oralda 15 minýt ishinde jol erejesin birneshe ret buzǵan júrgizýshi jaýapqa tartyldy. Bul týraly IIM málimdedi, dep habarlaidy dalanews.kz.
Jelige monitoring júrgizý barysynda BMW kóliginiń júrgizýshisi jolda júrý erejelerin óreskel buzyp, qaýipti manevrler jasaǵany kórinetin video anyqtalǵan.
Kadrda júrgizýshi kólikterdi qatarynan basyp ozyp, birin sol jaǵynan, ekinshisin oń jaǵynan ainalyp ótip, qatty jyldamdyqpen júrgeni kórinedi.
Tekseris nátijesinde kólik anyqtalyp, júrgizýshi kim ekeni belgili boldy. Ol - Batys Qazaqstan oblysynyń 18 jastaǵy turǵyny.
"Beinebaqylaý júiesi arqyly júrgizilgen qosymsha tekseris barysynda júrgizýshi nebári 15 minýt ishinde Oral qalasyndaǵy kólik qozǵalysy qarqyndy Ábilqaiyr han dańǵyly men Sholohov kóshesinde jol qozǵalysy erejelerin birneshe ret buzyp, ózge kólik júrgizýshilerine qaýip tóndiretin manevrler jasaǵany anyqtaldy. Júrgizýshi zań aiasynda jaýapqa tartyldy, profilaktikalyq túsindirý jumystary júrgizildi", - dedi IIM ókilderi.
