Respýblika kúni qarsańynda Qaraǵandyda qoǵamdyq kólikterdi jańartý jumystary jalǵasýda. Jaqynda «Taksokombinat» JShS 20 jańa avtobýs aldy. Aldaǵy ýaqytta qalaǵa taǵy da jańa avtobýstar jetkizilip, birneshe baǵyttaǵy eski kólikter aýystyrylady, dep habarlaidy dalanews.kz.
Qaraǵandy qalasynyń ákimi Meiram Qojýhov áleýmettik jelidegi paraqshasynda jyl sońyna deiin qalalyq avtoparkter 122 jańa avtobýs satyp alýdy josparlap otyrǵanyn habarlady. Jańa avtobýstar eskilerin aýystyrý úshin ǵana emes, keibir baǵyttardaǵy kólik sanyn kóbeitý úshin de alynady.
«Qaraǵandyda avtobýstar kóp bolýy kerek. Jańa avtobýstar kóbeiip, eskileri azaiýy tiis. Qazir osy baǵytta jumys istep jatyrmyz», – dep jazdy qala ákimi.
«Taksokombinatqa» kelgen 20 jańa avtobýs №28 jáne №31 baǵyttarǵa shyǵarylady. Osylaisha, bul baǵyttarda avtobýstar sany kóbeiedi. Al №01 baǵyttaǵy eski avtobýstar jańalaryna aýystyrylady.
Jaqyn kúnderi qalaǵa taǵy segiz jańa avtobýs keledi dep kútilýde. Olardy «Avtopredpriiatie» JShS №012 baǵytqa shyǵarýdy josparlap otyr.
Jyl sońyna deiin eń kóp avtobýs №3 avtoparkke jetkiziledi. Kásiporyn 60 jańa avtobýs satyp alýdy josparlaǵan. Olar 2013 jyldan beri qala kóshelerinde qatynap júrgen eski avtobýstardy almastyrady.
Jańa avtobýstar úsh kezeńmen keledi. Birinshi bóligi qazan aiynyń sońyna deiin, ekinshisi qarashada, al qalǵany jeltoqsanda jetkiziledi.
Qalada avtobýstardy jańartý jumystary jyl basynan beri júrgizilip keledi. Qazirdiń ózinde birqatar baǵyttarda jańa avtobýstar jolaýshylardy tasymaldap júr.
Mysaly, naýryz aiynda «Ekspress» avtoparki 22 jańa avtobýsty jolǵa shyǵardy. Sonyń nátijesinde №29 baǵyttaǵy eski avtobýstar aýystyrylyp, kólik sany kóbeidi.
Al shilde aiynda «Reis» avtoparki 12 jańa avtobýs satyp alyp, olardy №07 jáne №011 baǵyttarǵa shyǵardy.
Osylaisha, biyl satyp alý josparlanǵan 122 avtobýstyń 34-i qazirdiń ózinde qala kóshelerinde júr. Taǵy 20 avtobýs jaqynda «Taksokombinatqa» jetkizildi. Qalǵan 68 avtobýs jyl sońyna deiin keledi dep kútilýde.
Jalpy, sońǵy bes jylda Qaraǵandydaǵy qalalyq avtobýstardyń 80 paiyzy jańartyldy.
Aita keteiik, biyl 25 qazanda Respýblika kúnimen qatar Avtomobil kóligi qyzmetkerleriniń kúni de atap ótiledi. Sondyqtan jańa avtobýstardyń jetkizilýi kólik salasy qyzmetkerleriniń kásibi merekesimen de tuspa-tus kelip otyr.
Qala ákimi Meiram Qojýhovtyń aitýynsha, basty maqsat tek jańa avtobýstar satyp alý emes. Eń mańyzdysy - avtobýstardyń ýaqytynda kelýi, baǵyttarda kólik sanynyń jetkilikti bolýy jáne turǵyndardyń aialdamada uzaq kútpeýi.
«Jolaýshylar úshin eń bastysy - avtobýstyń ýaqytynda kelýi, baǵytta kóliktiń jetkilikti bolýy jáne jumysqa, oqýǵa nemese úige uzaq kútpei jetý», - dep atap ótti qala ákimi.
