Asqar Omarov Qazaqstan Halyq Keńesi tóraǵasynyń keńesshisi qyzmetine taǵaiyndaldy, dep habarlaidy dalanews.kz.
Asqar Omarov kim?
Asqar Omarov 1976 jyly Almaty qalasynda dúniege kelgen. «Turan» ýniversitetin támamdaǵan. Qazirgi ýaqytta Ortalyq kommýnikatsiialar qyzmetiniń resmi saitynda ol mekeme direktory retinde kórsetilgen.
Eńbek jolyn 1997 jyly Respýblikalyq mádeniet máseleleri jónindegi ǵylymi ortalyqta maman bolyp bastaǵan. 1998–1999 jyldary «Qazaqstannyń shaǵyn biznesi» jýrnalynda marketing jónindegi maman qyzmetin atqarsa, 2001–2005 jyldary «Novosti nedeli» gazetinde tilshi bolǵan.
2005–2006 jyldary «Qazaqstan» RTRK-nyń «Astana» telearnasy filialy aqparattyq-taldaý baǵdarlamalary direktsiiasynyń Almaty biýrosyn basqardy. Al 2008–2010 jyldary «Nur-Media» JShS direktorynyń orynbasary qyzmetin atqardy.
2011–2013 jyldary Túrki akademiiasynyń vitse-prezidenti boldy. 2014 jyly «Astana EKSPO-2017» ulttyq kompaniiasynyń basqarýshy direktory qyzmetine taǵaiyndaldy. 2016–2017 jyldary qoǵamdyq qordy basqardy.
2017–2020 jyldary «QazAqparat» halyqaralyq aqparat agenttiginiń bas direktory boldy. 2020 jyldan 2021 jylǵy tamyzǵa deiin agenttiktiń basqarma tóraǵasy qyzmetin atqardy.
2021 jylǵy tamyzda Aqparat jáne qoǵamdyq damý vitse-ministri bolyp taǵaiyndaldy. Al 2022 jylǵy 11 qańtarda osy ministrliktiń basshysy boldy.
2022 jylǵy 2 qyrkúiekte Asqar Omarov Prezident janyndaǵy Ortalyq kommýnikatsiialar qyzmetiniń direktory qyzmetine taǵaiyndaldy. Keshe ol osy qyzmetten ketkeni belgili boldy.
