Qazaqstanda 142 kópir apatty jaǵdaida tur, onyń 141-i jergilikti mańyzy bar joldarda ornalasqan. Taǵy 420 kópirdiń jaǵdaiy qanaǵattanarlyqsyz. Osyǵan bailanysty Quryltai depýtaty Turarbek Tólemisov kópirlerdi jóndeý jáne qaita jańǵyrtý boiynsha biryńǵai baǵdarlama ázirleýdi usyndy, dep habarlaidy dalanews.kz.
Depýtattyń aitýynsha, Memleket basshysy Qasym-Jomart Toqaev jol sapasyn eldiń «ahilles ókshesi» dep ataǵan. Bul baǵa jergilikti mańyzy bar joldardaǵy kópirlerdiń jaǵdaiyna da qatysty. 2026 jylǵy 1 qańtardaǵy málimet boiynsha, Qazaqstanda 3 623 kópir qurylysy esepke alynǵan. Onyń 1 488-i respýblikalyq mańyzy bar joldarda, al 2 135-i jergilikti joldarda ornalasqan.
Turarbek Tólemisovtiń málimetinshe, apatty kópirlerdiń eń kóbi Qyzylorda jáne Túrkistan oblystarynda tirkelgen. Qyzylorda oblysynda 87, Túrkistan oblysynda 50 kópir apatty jaǵdaida tur.
Sonymen qatar Ulytaý oblysynda 24 kópirdiń 21-i, Batys Qazaqstan oblysynda 51 kópirdiń 44-i qanaǵattanarlyqsyz jaǵdaida.
Depýtat jergilikti joldardaǵy kópirlerdiń tek 31,5%-y jaqsy jaǵdaida ekenin atap ótti. Al respýblikalyq mańyzy bar joldardaǵy bul kórsetkish 50,5%-dy quraidy.
«Kóptegen aýyl turǵyndary úshin mundai kópir aýdan ortalyǵymen, mekteppen jáne aýrýhanamen bailanystyratyn jalǵyz jol bolýy múmkin», – dedi Tólemisov.
Osyǵan bailanysty depýtat 2027–2031 jyldarǵa arnalǵan kópirlerdi kútip ustaý jáne qaita jańǵyrtý jónindegi biryńǵai baǵdarlama ázirleýdi usyndy. Onyń aitýynsha, baǵdarlama respýblikalyq, oblystyq jáne aýdandyq mańyzy bar joldardy qamtýy kerek. Ony júzege asyrýǵa oblys ákimdikteri qatysyp, óńirlik josparlar ázirleýi qajet. Sondai-aq depýtat jergilikti joldardaǵy kópirlerdi biryńǵai ádisteme boiynsha túgendep, pasporttaýdy jáne olarǵa kópirlerdi paidalanýyn basqarý júiesin engizýdi usyndy.
Budan bólek, ol apatty jaǵdaida turǵan 142 kópirdiń árqaisysynda qaýipsizdikti qamtamasyz etý úshin qandai sharalar qabyldanǵany, jobalyq-smetalyq qujattamanyń bar-joǵy jáne jóndeý jumystarynyń qashan bastalatyny týraly aqparat berýdi surady.
Tólemisov 2023–2026 jyldary kópir qurylystaryna naqty qansha qarajat jumsalǵany jáne 2031 jylǵa deiin qajetti qarjylandyrý kólemi týraly esep usynýdy da talap etti.
