2026 jylǵy 21 qazannan bastap Qonaev – Taldyqorǵan tasjolynda kólikterdiń ortasha qozǵalys jyldamdyǵyn baqylaý júiesi iske qosylady. Osylaisha, respýblikalyq mańyzy bar joldardaǵy mundai baqylaý júrgiziletin ýchaskelerdiń sany 16-ǵa jetedi, dep habarlaidy dalanews.kz.
«QazAvtoJol» ulttyq kompaniiasynyń habarlaýynsha, júie kóliktiń baqylaý arkalary arasyndaǵy ortasha jyldamdyǵyn esepteidi. Kameralar kóliktiń belgilengen núktelerden ótken ýaqytyn tirkeidi, sodan keiin júrip ótken qashyqtyq eskerile otyryp, ortasha jyldamdyq anyqtalady. Sondyqtan kameranyń aldyna jetkende jyldamdyqty tómendetý buzýshylyqty tirkeýden qutqarmaidy. Eger júrgizýshi baqylanatyn jol ýchaskesinde belgilengen shekti jyldamdyqtan asyp ketse, júie zańbuzýshylyqty anyqtai alady.
«QazAvtoJol» derekterine sáikes, 2026 jyldyń basynan beri respýblikalyq mańyzy bar avtomobil joldarynda ortasha jyldamdyqty asyrýdyń 550 myń deregi tirkelgen. Al jyldamdyqty belgili bir sátte ólsheý arqyly taǵy 163,5 myń zańbuzýshylyq anyqtalǵan. Jalpy, jyldamdyq rejimin buzýdyń 713 myńnan astam deregi tirkeldi.
Qazaqstannyń respýblikalyq mańyzy bar avtomobil joldarynda ortasha jyldamdyqty baqylaý júiesi 2025 jylǵy 17 naýryzdan bastap jumys isteidi. Bastapqyda júie jalpy uzyndyǵy 3 myń shaqyrymǵa jýyq aqyly joldyń 11 ýchaskesin qamtydy. Olar: Astana – Shýchinsk, Astana – Pavlodar, Astana – Temirtaý, Shymkent – Qyzylorda, Shymkent – Taraz, Pavlodar – Semei – Qalbataý, Oral – Resei shekarasy (Saratov), Pavlodar – Resei shekarasy (Omby), Almaty – Qorǵas, Kókshetaý – Petropavl jáne Aqtóbe – Qandyaǵash baǵyttary.
2026 jylǵy 13 qazannan bastap ortasha jyldamdyqty baqylaý taǵy tórt baǵytta engizildi. Olar – Oral – Resei shekarasy (Samara), Aqtóbe – Resei shekarasy (Orynbor), Qostanai – Denisovka jáne Qandyaǵash – Maqat tasjoldary.
Qonaev – Taldyqorǵan baǵyty júiege qosylǵannan keiin respýblikalyq jol jelisinde ortasha jyldamdyq baqylanatyn ýchaskelerdiń jalpy sany 16-ǵa jetedi.
Ulttyq kompaniia ókilderi baqylaý júiesin keńeitýdiń maqsaty jol qozǵalysy qaýipsizdigin arttyrý, jol-kólik oqiǵalarynyń aldyn alý jáne júrgizýshilerdiń tártibin qalyptastyrý ekenin atap ótti. Osyǵan bailanysty «QazAvtoJol» júrgizýshilerdi búkil jol boiynda belgilengen jyldamdyq rejimin saqtaýǵa shaqyrdy.
