Qyzylordada Aral óńiriniń tabiǵatyn saqtaýǵa jáne ekojúiesin qorǵaýǵa baǵyttalǵan «GREEN ARAL: VOLUNTEERS FOR LIFE 2026» halyqaralyq volonterler aptalyǵynyń ashylý rásimi ótti, dep habarlaidy dalanews.kz.
Bastama Memleket basshysy Qasym-Jomart Kemeluly Toqaevtyń usynysymen BUU jariialaǵan Turaqty damý maqsatyndaǵy Halyqaralyq volonterler jylyna orai uiymdastyryldy.
Jiynnyń ashylý rásimine oblys ákiminiń birinshi orynbasary Daniiar Janalinov, Qazaqstan Respýblikasy Mádeniet jáne aqparat ministrligi Azamattyq qoǵam isteri komiteti tóraǵasynyń orynbasary Toǵjan Zeidenova, Qazaqstan Halyq Keńesiniń músheleri Vera Kim men Janar Bimuratqyzy, oblystyq qoǵamdyq keńes tóraǵasy Naýryzbai Baiqadamov, sondai-aq Ózbekstan, Qyrǵyzstan jáne Qazaqstannyń 10 óńirinen kelgen 100 volonter jáne oblystaǵy 500-den astam belsendi stýdentter men erikti jastar qatysty.
Jiynda oblys ákiminiń birinshi orynbasary Daniiar Janalinov qatysýshylardy «GREEN ARAL» halyqaralyq volonterler aptalyǵynyń ashylýymen quttyqtap, volonterliktiń el ómirindegi mańyzyna toqtaldy. 
«Búgingi basqosýdyń Syr óńirinde ótýi jáne aptalyqtyń «GREEN ARAL» dep atalýy airyqsha mánge ie. Bul – qorshaǵan ortany qorǵaýǵa, ekologiialyq mádenietti qalyptastyrýǵa jáne Aral óńiriniń taǵdyryna degen ortaq jaýapkershilikti sezinýge úndeitin mańyzdy bastama. Aral máselesi – elimizdiń ǵana emes, búkil álemniń nazaryndaǵy ózekti taqyryp. Tabiǵatqa janashyrlyq tanytyp, ekologiialyq túitkilderdiń sheshimine úles qosý – barshamyzǵa ortaq mindet. Syr eline kelgen saparlaryńyz sátti, júzdesýlerińiz mazmundy, bastamalaryńyz nátijeli bolsyn!», – dedi Daniiar Erenǵaliuly.
Sondai-aq, aimaqtaǵy volonterlik qozǵalystyń órkendeýine úles qosyp, qoǵamdyq jumystarda belsendilik tanytyp júrgen birqatar azamattar oblys ákiminiń «Alǵys hatymen» marapattaldy. Shara aiasynda Qazaqstan Respýblikasy Mádeniet jáne aqparat ministrligi Azamattyq qoǵam isteri komiteti tóraǵasynyń orynbasary Toǵjan Zeidenova sóz sóilep, volonterler bastamalaryn qoldaýdyń mańyzyn atap ótti.
Al, «Ulttyq volonterlik jeli» tóraǵasy, Qazaqstan Halyq Keńesiniń múshesi Vera Kim Qazaqstan Halyq Keńesiniń tóraǵasy Erlan Qoshanovtyń arnaiy quttyqtaý hatyn oqyp berdi.
Aptalyq jastar arasynda volonterlik qozǵalysty damytýǵa, ekologiialyq mádenietti qalyptastyrýǵa jáne halyqaralyq yntymaqtastyqty nyǵaitýǵa baǵyttalǵan.
Baǵdarlama barysynda qatysýshylar tájiribe almasyp, ekologiialyq bastamalaryn tanystyrady. Budan bólek, olar qorshaǵan ortaǵa qatysty ózekti máselelerdi birlesip sheshý joldaryn qarastyrady. Negizgi is-sharalar Qyzylorda oblysynyń Aral aýdanynda ótedi.
Aptalyq aiasynda belsendi jastardyń tájiribe almasý jáne bir-birimen bailanysyn nyǵaitý maqsatynda «KZO CAMP: ONE COMMUNITY» respýblikalyq volonterler sleti de ótti.
«GREEN ARAL: VOLUNTEERS FOR LIFE 2026» halyqaralyq aptalyǵy jastardyń, qoǵamdyq uiymdar men halyqaralyq seriktesterdiń basyn qosyp, ekologiialyq volonterlikti damytýǵa jáne Aral óńiriniń tabiǵatyn qorǵaýǵa baǵyttalǵan bastamalardy qoldaýǵa jol ashady.
