Qaraǵandyda mas kúide jolaýshylar avtobýsyn júrgizgen júrgizýshi 15 táýlikke ákimshilik qamaqqa alynyp, jeti jylǵa kólik basqarý quqyǵynan aiyryldy, dep habarlaidy dalanews.kz.
Qaraǵandy qalasynyń mamandandyrylǵan aýdanaralyq ákimshilik quqyq buzýshylyqtar jónindegi sotynyń málimetinshe, oqiǵa biyl 13 qazanda Nursultan Nazarbaev dańǵylynda bolǵan. «Dong Feng» markaly qoǵamdyq kóliktiń júrgizýshisi alkogoldik masań kúide avtobýs basqarǵan.
Sot júrgizýshiniń áreketi jolaýshylardyń jáne jol qozǵalysyna qatysýshylardyń ómiri men densaýlyǵyna qaýip tóndirgenin anyqtady.
Ol Ákimshilik quqyq buzýshylyq týraly kodekstiń 608-babynyń 1-bóligi boiynsha kináli dep tanyldy. Bul bapqa sáikes, alkogoldik masań kúide kólik basqarǵany úshin 15 táýlikke ákimshilik qamaqqa alý jáne jeti jylǵa kólik quralyn basqarý quqyǵynan aiyrý jazasy qarastyrylǵan.
Sot qaýlysy zańdy kúshine endi.
