2027 jylǵy 1 qańtardan bastap Qazaqstanda jumysynan aiyrylǵan azamattarǵa tólenetin áleýmettik tólemniń merzimi qysqarady. Buǵan deiin járdemaqy alty aiǵa deiin taǵaiyndalsa, jańa tártip boiynsha tólem úsh aidan aspaidy, dep habarlaidy dalanews.kz.
Jumysynan aiyrylý jaǵdaiyna bailanysty áleýmettik tólem mindetti áleýmettik saqtandyrý júiesine qatysý ótiline qarai taǵaiyndalady.
Járdemaqy qansha ýaqyt tólenedi?
Jańa tártip boiynsha tólem merzimi áleýmettik saqtandyrý júiesine qatysý uzaqtyǵyna bailanysty bolady:
- 6 aidan 12 aiǵa deiin – bir ai;
- 12 aidan 24 aiǵa deiin – eki ai;
- 24 aidan astam – úsh ai.
Osylaisha, 2027 jyldan bastap jumysynan aiyrylǵan azamattarǵa tólenetin járdemaqynyń eń uzaq merzimi úsh aidy quraidy.
Járdemaqy mólsheri qalai esepteledi?
Áleýmettik tólemniń mólsheri azamattyń burynǵy tabysyna jáne áleýmettik saqtandyrý júiesine qatysý ótiline bailanysty esepteledi. Tólem mólsheri eń tómengi jalaqynyń jeti eselengen mólsheriniń 45 paiyzynan aspaýǵa tiis. Naqty soma áleýmettik aýdarymdar júrgizilgen tabys pen saqtandyrý júiesine qatysý ótili eskerile otyryp anyqtalady.
Mysaly, azamattyń ortasha ailyq tabysy 120 myń teńge bolsa jáne onyń áleýmettik saqtandyrý júiesine qatysý ótili bes jyldan assa, ai saiynǵy tólem shamamen 54 myń teńgeni quraýy múmkin.
Jumyssyzdyq boiynsha járdemaqyny qalai alýǵa bolady?
Jumysynan aiyrylǵan azamat aldymen jumys izdeýshi retinde tirkelýi kerek. Ol úshin mansap ortalyǵyna júginýge nemese elektrondyq úkimettiń eGov.kz portaly men Enbek.kz platformasyn paidalanýǵa bolady. Eger azamatqa jumys tabylmasa jáne ol zańnamada belgilengen talaptarǵa sai kelse, jumyssyz mártebesin alyp, áleýmettik tólemge ótinish bere alady. Járdemaqy alý quqyǵy azamat jumys izdeýshi retinde tirkelgen kúnnen bastap týyndaidy.
Sonymen qatar jumyssyz azamattarǵa jumyspen qamtýǵa járdemdesýdiń basqa da sharalary usynylýy múmkin. Olardyń qatarynda kásiptik oqytý, biliktilikti arttyrý jáne sýbsidiialanatyn jumys oryndaryna ornalasý bar.
Jańa tártip kimderge qoldanylady?
Jańa erejeler 2027 jylǵy 1 qańtardan bastap áleýmettik tólem taǵaiyndaýǵa ótinish bergen azamattarǵa qoldanylady. Al osy kúnge deiin járdemaqy taǵaiyndalǵan azamattarǵa tólem buryn bekitilgen merzim aiaqtalǵansha qoldanystaǵy tártippen jalǵasady.
