2027 jylǵy 1 qańtardan bastap Qazaqstanda ataýly áleýmettik kómek (AÁK) taǵaiyndaýdyń jańa qaǵidalary kúshine enedi. Tiisti qaýlyǵa premer-ministr Oljas Bektenov qol qoidy, dep habarlaidy dalanews.kz.
Jańa tártip boiynsha áleýmettik kómektiń mólsheri qalai esepteletini, qandai azamattarǵa jumyspen qamtýǵa qatysty talaptar qoiylmaityny jáne qandai jaǵdaida adamǵa áleýmettik qoldaý qajet emes dep tanylýy múmkin ekeni aiqyndaldy.
Ataýly áleýmettik kómek qalai esepteledi?
Úkimet bekitken qaǵidaǵa sáikes, AÁK mólsheri otbasynyń ár múshesine shaqqandaǵy ortasha tabys pen kedeilik sheginiń arasyndaǵy aiyrma negizinde esepteledi. Kedeilik shegi Astana, oblystar jáne respýblikalyq mańyzy bar qalalar úshin belgilengen kórsetkishterge sáikes anyqtalady. Áleýmettik kómektiń mólsheri otbasynyń ár múshesine jeke esepteledi.
AÁK-tiń qandai túrleri bolady?
Jańa qaǵidalar boiynsha ataýly áleýmettik kómektiń eki túri qarastyrylǵan: shartsyz jáne shartty aqshalai kómek. Shartsyz aqshalai kómek tabysy tómen azamattarǵa, sondai-aq I jáne II toptaǵy múgedektigi bar adamdarǵa beriledi.
Buǵan qosa, otbasynyń eńbekke jaramdy músheleri bolmaǵan jaǵdaida da shartsyz kómek taǵaiyndalýy múmkin. Eger otbasyndaǵy jalǵyz eńbekke jaramdy adam úsh jasqa tolmaǵan balany kútýmen ainalyssa, mundai otbasy da osy kómek túrin alýǵa quqyly.
Shartty aqshalai kómek alý úshin áleýmettik kelisimshart jasasý mindetti bolady. Iaǵni kómek taǵaiyndaý kezinde azamat pen tiisti áleýmettik qyzmetter arasyndaǵy kelisimshart talaptary eskeriledi. Jańa qaǵidalar 2027 jylǵy 1 qańtardan bastap qoldanysqa engiziledi.
