«Ádilet» partiiasynyń depýtaty Ainagúl Baltasheva pedagog-assistentterdiń aptalyq normativtik oqý júktemesin 16 saǵat etip bekitip, eńbekaqy esepteýdiń biryńǵai tártibin engizýdi usyndy. Depýtat bul máseleni Oqý-aǵartý ministri Juldyz Súleimenovaǵa joldaǵan saýalynda kóterdi, dep habarlaidy dalanews.kz.
Depýtattyń aitýynsha, Qazaqstanda erekshe bilim berý qajettilikteri bar 237 myńǵa jýyq bala tirkelgen. Al bilim berý uiymdarynda shamamen 6,5 myń pedagog-assistent jumys isteidi.
Baltasheva pedagog-assistentter erekshe bilim berý qajettilikteri bar balalardyń bilim alýyna, áleýmettik ortaǵa beiimdelýine, derbestik daǵdylaryn damytýyna jáne ózine degen senimin qalyptastyrýyna kómektesetinin atap ótti. Sondyqtan olardyń eńbek jaǵdaiy men eńbekaqysyn ádil retteý inkliýzivti bilim berýdiń sapasyna tikelei áser etedi.
Depýtattyń sózinshe, qazirgi normativtik retteýde pedagog-assistentterdiń aptalyq oqý júktemesi men jumys ýaqytyn esepteý tártibin naqtylaý qajet. Buǵan deiin olardyń eńbekaqysyn esepteý kezinde aptasyna 16 saǵattyq normativtik oqý júktemesi qoldanylǵan. Alaida qoldanystaǵy erejelerdegi aiqyndyqtyń jetkiliksizdigi óńirlerde jumys ýaqytyn árkelki esepteýge múmkindik berip otyr.
Osyǵan bailanysty Ainagúl Baltasheva Oqý-aǵartý ministrligine úsh usynys engizdi.
Birinshiden, «Pedagog mártebesi týraly» zań talaptaryn eskere otyryp, pedagog-assistentterdiń aptasyna 16 saǵattyq normativtik oqý júktemesin quqyqtyq turǵydan bekitý múmkindigin qarastyrý jáne oǵan qarjylyq negizdeme ázirleý usynyldy.
Ekinshiden, balany tikelei súiemeldeýge jumsalatyn ýaqytty sabaqqa daiyndalý, pedagogtermen birlesip jumys isteý jáne qujattama júrgizý sekildi ózge kásibi mindetterden ajyratyp, jumys ýaqytyn esepke alý tártibin belgileý qajet.
Úshinshiden, pedagog-assistentterdiń eńbek júktemesi men eńbekaqysyn esepteýdiń respýblika boiynsha biryńǵai tártibin engizý usynyldy.
«Pedagog-assistenttiń eńbek quqyǵyn qorǵaý – erekshe balanyń sapaly bilim alý quqyǵyn qorǵaý», – dep atap ótti depýtat.
Ainagúl Baltasheva kóterilgen máseleler boiynsha zańnamada belgilengen tártippen jazbasha jaýap berýdi surady.
