Quryltai depýtaty Naýryz Sailaýbai Astanadaǵy qyzmettik páterler men depýtattarǵa arnalǵan kólik artyq shyǵyn emes ekenin málimdedi. Onyń aitýynsha, depýtattar kommýnaldyq qyzmet aqysyn ózderi tóleidi, dep habarlaidy dalanews.kz.
Ulysmedia.kz tilshisi Naýryz Sailaýbaidan jetkilikti tabysy bar depýtattar memlekettik qyzmettik baspana men kólikten bas tartýǵa daiyn ba dep surady.
Depýtattyń aitýynsha, 145 depýtattyń arasynda óńirlerden kelgender bar jáne olardyń barlyǵynyń Astanada jeke baspanasy bolmaýy múmkin. Sondyqtan qyzmettik páterler depýtattardyń jumys ornyna jaqyn turýy úshin beriledi.
Al qyzmettik kólik tek bir jerden ekinshi jerge jetý úshin paidalanylatynyn aitty. Onyń sózinshe, júrgizýshi mejeli jerge jetkizgennen keiin kólik sol jerde kútip turmaidy, bosatylady.
«Artyq shyǵyn joq dep aita alamyn», – dedi Naýryz Sailaýbai.
Kommýnaldyq tólemdi ózderi óteidi
Memlekettik páterdiń ornyna óz aqshasyna baspana jaldaýǵa daiyn ba degen suraqqa depýtat áriptesteri úshin jaýap bere almaitynyn aitty. Al ózi memleket bergen páterde turatynyn jetkizdi.
Jeke qarajatyna baspana jaldaý máselesine qatysty suraqqa jaýap bergende, ol kommýnaldyq qyzmetterge jumsalatyn shyǵyndardy da atap ótti.
«Kommýnaldyq qyzmet aqysyn ózimiz tóleimiz. Qysta shamamen 45–60 myń teńge shyǵady. Bul memleket esebinen tólenbeidi. Segizinshi shaqyrylymdaǵy Májiliste jumys istegen kezimde úsh bólmeli páter aldym, sonda turdym. Ókilettigim aiaqtalǵannan keiin páterdi qaitardym. Eger páterde bir nárseni búldirsem, ony qalpyna keltirýge mindettimin», – dedi depýtat.
Osylaisha, Naýryz Sailaýbai qyzmettik baspana men kóliktiń berilýin depýtattardyń jumys jaǵdaiymen bailanystyrdy. Alaida jeke tabysy jetkilikti depýtattardyń memlekettik páterden bas tartýǵa daiyndyǵy týraly suraqqa ózi úshin naqty jaýap bergen joq.
