Prezident Qasym-Jomart Toqaev Bas prokýror Berik Asylovty qabyldady. Kezdesýde eldegi qylmystyq ahýal, zańsyz aktivterdi qaitarý, azamattardyń quqyqtaryn qorǵaý jáne prokýratýra organdarynyń atqarǵan jumysy talqylandy, dep habarlaidy dalanews.kz.
Berik Asylov Memleket basshysyna elimizdegi zańdylyqtyń saqtalýy men qylmystyń aldyn alý baǵytynda qabyldanǵan sharalar týraly esep berdi.
Bas prokýrordyń málimetinshe, biylǵy toǵyz aida Qazaqstanda qylmystyq quqyqbuzýshylyqtar sany 14,6 paiyzǵa azaiǵan. Onyń ishinde qoǵamdyq oryndarda jasalǵan qylmystar 22,3 paiyzǵa, kóshedegi quqyqbuzýshylyqtar 20,1 paiyzǵa tómendegen.
Quqyq qorǵaý organdary internet-alaiaqtyq, esirtki qylmysy jáne qoǵamǵa qaýip tóndiretin ózge de zańsyz árekettermen kúresti kúsheitken. Bul baǵyttaǵy jumystar basqa memlekettik qurylymdarmen birlesip júrgizilip jatyr.
Qazaqstanǵa 1,3 trln teńgeniń aktivi qaitaryldy
Kezdesýde zańsyz iemdenilgen aktivterdi memleketke qaitarý jumystarynyń nátijesi de jariialandy.
Berik Asylovtyń málimetinshe, búginge deiin jalpy quny 1,3 trillion teńgege jetetin aktivter memleketke qaitarylǵan. Bul qarajat áleýmettik mańyzy bar nysandardy salýǵa jáne qoldanystaǵy infraqurylymdy jańǵyrtýǵa baǵyttalǵan.
«Osy qarajat esebinen 466 áleýmettik infraqurylymnyń qurylysy men rekonstrýktsiiasy qarjylandyryldy, onyń 378-i aiaqtaldy», – delingen resmi habarlamada.
Atap aitqanda, elimizdiń alty oblysynda iri meditsinalyq nysandar paidalanýǵa berilgen. Astanada Qajymuqan Muńaitpasov atyndaǵy fýtbol stadionynyń qurylysy aiaqtalǵan. Sondai-aq Balqash, Pavlodar jáne Arqalyq qalalaryndaǵy áýejailardy jańǵyrtý jumystary júrgizilgen.
Bas prokýratýra shetelge shyǵarylǵan aktivterdi qaitarý jáne qylmys jasaǵan adamdardy ekstraditsiialaý baǵytynda halyqaralyq yntymaqtastyqty da keńeitip keledi.
Vedomstvo osy ýaqytqa deiin 39 iýrisdiktsiiamen 92 ekijaqty kelisimge qol qoiǵan. Sonyń nátijesinde Qazaqstanǵa 50 adam ekstraditsiialanǵan. Al elimizden shet memleketterge 123 adam berilgen.
413 myń azamattyń quqyǵy qalpyna keltirildi
Bas prokýror azamattardyń áleýmettik jáne eńbek quqyqtaryn qorǵaý baǵytynda atqarylǵan jumystarǵa da toqtaldy.
Onyń málimetinshe, prokýratýra organdarynyń aralasýymen 413 myń adamnyń konstitýtsiialyq quqyǵy qalpyna keltirilgen. Sonyń ishinde 200 myńnan astam jumyskerdiń eńbek quqyǵy qorǵalǵan.
«Eńbekaqy boiynsha 2,5 milliard teńge, aliment boiynsha 7,9 milliard teńge bereshek óndirildi», – dep kórsetilgen resmi málimette.
Budan bólek, memlekettik qarjynyń jumsalýyna júrgizilgen qadaǵalaý barysynda jalpy somasy 535 milliard teńgege qatysty zań buzýshylyqtardyń joly kesilgen.
Prokýratýra organdary qabyldaǵan sharalardyń nátijesinde biýdjetke 66,4 milliard teńge qaitarylǵan.
Úsh myńnan astam investitsiialyq joba prokýrorlardyń baqylaýynda
Kezdesýde investorlardyń quqyqtary men zańdy múddelerin qorǵaý máselesine de nazar aýdaryldy.
Berik Asylov Prezidenttiń 2025 jylǵy 17 jeltoqsandaǵy Jarlyǵyn oryndaý aiasynda investorlardy qorǵaýdyń júieli modeli engizilgenin málimdedi.
Jyl basynan beri prokýratýra organdary 2886 investorǵa kómek kórsetken. Qazirgi ýaqytta prokýrorlar 3,5 myń investitsiialyq jobanyń júzege asyrylýyn qadaǵalap otyr.
Investorlar tap bolatyn ákimshilik kedergiler men ózge de máselelerdi der kezinde anyqtaý úshin tsifrlyq tehnologiialardyń múmkindigi paidalanylmaq.
Atap aitqanda, Ulttyq tsifrlyq investitsiialyq platformany «Tsifrlyq qadaǵalaý» júiesimen biriktirý kózdelgen. Bul investitsiialyq jobalardyń iske asý barysyn baqylap, týyndaǵan túitkilderge jedel áreket etýge múmkindik beredi.
Toqaev Bas prokýratýraǵa qandai tapsyrma berdi?
Kezdesý barysynda Memleket basshysy eldegi zań ústemdigin qamtamasyz etý jáne qoǵamdyq qaýipsizdikti nyǵaitý máselelerine erekshe nazar aýdardy.
Sonyń ishinde «Zań men tártip» qaǵidatyn qoǵamda, ásirese jastar arasynda keńinen nasihattaý qajettigi talqylandy.
Prezident prokýratýra organdarynyń jumysyn jetildirý úshin tsifrlyq tehnologiialar men jasandy intellekt múmkindikterin keńinen paidalanýdyń mańyzyn da atap ótti.
Qasym-Jomart Toqaev barlyq salada zańdylyqtyń saqtalýyn qamtamasyz etý, quqyqbuzýshylyqtyń aldyn alý jáne qoǵamdyq tártipti nyǵaitý baǵytyndaǵy jumystardy jalǵastyrýdy tapsyrdy.
Memleket basshysy ásirese sailaý kezeńinde quqyqtyq tártipti saqtaý sharalaryn úilestirýge basa mán berýdi mindettedi.
Sonymen qatar Prezident Ádiletti Qazaqstannyń konstitýtsiialyq qundylyqtaryn múltiksiz saqtaý qajettigin atap ótti.
