Qazaqstannyń tuńǵysh prezidenti Nursultan Nazarbaevtyń nemeresi, kásipker Nuraly Áliev rýhani tájiribeleri men ómirden ótken jaqyndary týraly ashyq áńgimeledi. Ol qaitys bolǵan týystarynyń rýhymen kezdeskendei áser alǵanyn aitqan. Alaida kásipkerdiń eki saǵatqa sozylǵan suhbaty keiin YouTube platformasynda qoljetimsiz bolyp qaldy, dep habarlaidy dalanews.kz.
Nuraly Áliev qazaqstandyq kásipker Ásel Mashanovanyń podkastyna qatysyp, jeke ómiri, dini senimi jáne sońǵy jyldary ainalysyp júrgen rýhani izdenisteri týraly baiandaǵan.
Kásipker bul taqyryptarǵa qyzyǵýshylyǵynyń qalai bastalǵanyn da túsindirdi.
"Inimdi emdeýdiń jolyn izdedim"
Nuraly Álievtiń aitýynsha, onyń dástúrli emes rýhani tájiribelerge den qoiýyna marqum inisi Aisultan Nazarbaevtyń jaǵdaiy áser etken.
Aisultan kózi tirisinde esirtkige táýeldilik máselesimen kúresken. Aǵasy oǵan kómektesýdiń túrli joldaryn qarastyryp, osy izdenis barysynda psihodelikalyq tájiribelerge qyzyǵýshylyq tanytqanyn jetkizdi.
"Men úshin bul, sózsiz, izdenis boldy. Eń aldymen, qazir aramyzda joq inimdi emdeýdiń jolyn izdedim", – degen Nuraly Áliev.
Aita keteiik, Aisultan Nazarbaev 2020 jyldyń tamyzynda Londonda 29 jasynda qaitys boldy. Ulybritaniiada júrgizilgen saraptama onyń ólimine kokainnen ýlaný saldarynan júrektiń toqtaýy sebep bolǵanyn anyqtaǵan.
"Ómirden ótken týystarymmen kezdestim"
Suhbattyń kópshilik nazaryn aýdarǵan tusy – Nuraly Álievtiń erekshe rýhani tájiribeleri týraly áńgimesi.
Kásipker Ońtústik Amerikadaǵy keibir dástúrli rásimderde qoldanylatyn aiavaska atty psihobelsendi sýsynǵa qatysty tájiribesin baiandaǵan.
Onyń aitýynsha, mundai tájiribege qatyspas buryn psihodelikalyq zattar týraly shamamen bes jyl boiy aqparat jinap, zerttegen.
Sondai-aq ol úsh táýlik boiy tolyq qarańǵylyqta, syrtqy ortamen bailanyssyz bolǵanyn aitqan.
Nuraly Álievtiń sózinshe, osy ýaqytta ózin ómirden ótken jaqyndarymen kezdeskendei sezingen.
"Men ómirden ótken týystarymmen kezdestim. Olardyń ózderi ekenin, olardyń rýhy ekenin anyq sezindim", – degen kásipker.
Degenmen mundai sezimder men elesterdi qaitys bolǵan adamdardyń rýhymen shynaiy kezdesý dep ǵylymi turǵydan rastaýǵa negiz joq. Psihobelsendi zattar adamnyń qabyldaýyna jáne sana kúiine áser etýi múmkin.
Nuraly Áliev dástúrli emes tájiribelerge qyzyǵýshylyq tanytqanymen, ózin musylman sanaitynyn, meshitke baryp, namaz oqitynyn da jetkizgen.
Eki saǵattyq suhbat nege óshirildi?
Kásipkerdiń Ásel Mashanovaǵa bergen kólemdi suhbaty YouTube platformasynda jariialanǵan.
Alaida keiin beinejazba qoljetimsiz bolyp qalǵan.
Suhbattyń nelikten joǵalǵany belgisiz. Ony avtordyń ózi alyp tastaǵany ma, álde basqa sebep bolǵany ma – bul jóninde rastalǵan aqparat joq.
Suhbat avtory men Nuraly Áliev tarapynan beinejazbanyń qoljetimsiz bolýyna qatysty túsinikteme jariialanbaǵan.
Nuraly Áliev kim?
Nuraly Áliev – Qazaqstannyń tuńǵysh prezidenti Nursultan Nazarbaevtyń úlken nemeresi, Dariǵa Nazarbaeva men marqum Rahat Álievtiń tuńǵysh uly.
Ol 1985 jyly dúniege kelgen. Eńbek jolynda qarjy jáne kásipkerlik salalarynda jumys istep, "Nurbank" júiesinde basshylyq qyzmetter atqarǵan.
2014 jyldyń jeltoqsanynda Astana qalasy ákiminiń orynbasary bolyp taǵaiyndaldy. Keiin memlekettik qyzmetten ketip, kásipkerlikpen ainalysty.
Nuraly Álievtiń esimi Forbes Kazakhstan basylymy jariialaityn aýqatty kásipkerler tiziminde de atalǵan.
Sońǵy jyldary ol rýhani damý, meditatsiia jáne adamnyń ishki jan dúniesindegi ózgerister týraly kópshilik aldynda pikir bildirip júr.
