Mańǵystaý oblysy Qaraqiia aýdanynda Kaspii teńizi jaǵalaýyna bekire tuqymdas 173 balyqtyń óleksesi shyǵyp qalǵan, dep habarlaidy dalanews.kz.
Oblystyq balyq inspektsiiasy basqarmasy málimetinshe, 20 qazanda mamandar "Ómir glemping" demalys bazasynan Peschanyi múiisine deiingi, odan ári Quryq portyna deiingi jaǵalaýdy teksergen. Nátijesinde 15 shaqyrym aýmaqtan 173 balyqtyń óleksesi tabylǵan. Olar bir jerge úiilip qalmai, jaǵalaýda shashyrap jatqan.
Mamandardyń boljamynsha, qatty batys jeli óli balyqtardy jaǵaǵa shyǵarǵan. Olardyń jumsaq tinderinen gistologiialyq jáne toksikologiialyq zertteýlerge synama alý múmkin bolmaǵan.
"Osyǵan bailanysty balyqtardyń qyrylý sebebin anyqtaý múmkin emes. Syrttai tekserý kezinde olardan balyq aýlaý torlarynyń izderi, sondai-aq, aýyz qýysynan qarmaq quraldarynan qalǵan tesilgen izder anyqtalǵan joq", - dedi balyq inspektsiiasy basqarmasy ókilderi.
Qazir mamandar teńiz sýynan synama alyp jatyr. Ólekselerdi jinaý, tasymaldaý jáne joiý jumystary da júrgizilip jatyr. Oqiǵa týraly Qaraqiia aýdandyq politsiiasyna, Mańǵystaý oblysynyń Ekologiia departamentine jáne jergilikti atqarýshy organdarǵa habarlanǵan.
