Túrkiia azamaty Amin Abdallah Húseinniń 90 million teńgesine qatysty alaiaqtyq isi boiynsha kúdikti qamaýǵa alyndy. Almaty politsiiasy bul aqparatty Dalanews.kz saýalyna bergen jaýabynda rastady.
Kúdikti sot sanktsiiasymen qamaýǵa alyndy
Almaty qalasy Politsiia departamentiniń Dalanews.kz saýalyna bergen jaýabyna sáikes, alaiaqtyq deregi boiynsha qylmystyq isti Alataý aýdandyq Politsiia basqarmasy tergep jatyr.
"Tergeý aiasynda atalǵan qylmysqa kúdikti S. esimdi azamat ustaldy. Qazaqstan Respýblikasy Qylmystyq-protsestik kodeksiniń 132-babyna sáikes, ol ýaqytsha ustaý izoliatoryna qamaldy. Sottyń sanktsiiasymen kúdiktige qatysty qamaýda ustaý túrindegi bultartpaý sharasy qoldanyldy", - dep habarlady Almaty qalasy Politsiia departamentiniń baspasóz qyzmeti.
Qazirgi ýaqytta tergeý jalǵasyp jatyr. Politsiia istiń ózge mán-jaiy tergeý múddesine bailanysty jariialanbaitynyn jetkizdi.
Túrkiia azamaty 90 million teńge tólegenin málimdedi
Buǵan deiin Túrkiia azamaty Amin Abdallah Húsein jýrnalist ári bloger Jan Ahmadievke suhbat berip, Aidyn Saltaqqa bir Toyota Land Cruiser 300 jáne eki Toyota Camry kóligin satyp alý úshin 90 million teńge aldyn ala tólem jasaǵanyn aitqan.
Onyń sózinshe, qarajat 2025 jyldyń qarashasynda berilgen. Alaida arada birneshe ai ótse de, kólikter jetkizilmegen jáne aqsha qaitarylmaǵan.
"Ony dosym Erkebulan arqyly tanydym. Ol maǵan Land Cruiser 300 jáne eki Toyota Camry kóligin satýdy usyndy. Men 90 million teńge aldyn ala tólem jasadym. Sodan beri kólikterdi alǵan joqpyn. Ol birde bir aidan keiin, birde on kúnnen soń beremin dep ýáde etti. Aqyrynda úsh ai buryn onyń ústinen aryz jazdym", - dedi Amin Abdallah Húsein.
Keiin Jan Ahmadiev áleýmettik jelidegi paraqshasynda kúdiktiniń qamaýǵa alynǵanyn habarlap, isti sońyna deiin baqylaýda ustaitynyn málimdedi.
"Meili depýtattar bolsyn, meili ministrler bolsyn, maǵan báribir. Ádildik úshin sońyna deiin baramyz. Kimniń áieli nemese kúieýi qandai qyzmette otyrsa da, zań aldynda bári teń bolýy kerek", - dedi ol.
Daýda Sholpan Ábdihalyqovanyń aty nege ataldy?
Jan Ahmadiev jariialaǵan materialdarda Aidyn Saltaqtyń jubaiy Sholpan Ábdihalyqovanyń Respublica partiiasy Almaty qalalyq filialyn basqaratyny aitylǵan. Avtor kúdiktiniń birneshe ai boiy bostandyqta júrýine onyń jubaiynyń saiasi bailanystary yqpal etýi múmkin degen boljam jasaǵan.
Sholpan Ábdihalyqova óz kezeginde buqaralyq aqparat quraldaryna suhbat berip, jariialanǵan aqparattyń birjaqty ekenin málimdegen. Degenmen onyń nemese partiiadaǵy qyzmetiniń tergeýge qandai da bir yqpal etkeni jóninde resmi dálel ázirge jariialanǵan joq.
Dalanews.kz atalǵan jaǵdaiǵa bailanysty Respublica partiiasyna da resmi saýal joldap, Sholpan Ábdihalyqovanyń áreketine qatysty saiasi uiymnyń ustanymyn surady.
