Respýblika kúni qarsańynda Shyǵys Qazaqstan oblysy Kúrshim aýdanynyń Qystaý-Kúrshim aýylynda 50 oqýshyǵa arnalǵan jańa mektep ashyldy. Zamanaýi ǵimarat jarty ǵasyrdan astam ýaqyt paidalanylyp, apatty jaǵdaiǵa jetken eski mekteptiń ornyna salyndy. Endi aýyl balalaryna jabdyqtalǵan oqý kabinetteri, zerthanalar, sport zaly jáne mektepke deiingi shaǵyn ortalyq qyzmet kórsetedi, dep habarlaidy dalanews.kz.
Burynǵy mektep 1974 jyly salynyp, 1975 jyly paidalanýǵa berilgen. Uzaq jyldar boiy paidalanylǵan ǵimarat ábden tozyp, jeke sport zalynyń bolmaýy dene shynyqtyrý sabaqtaryn ótkizý múmkindigin shektegen.
Jańa mektepte bir aýysymda bilim alýǵa qajetti barlyq jaǵdai jasalǵan. Munda oqý kabinetteri, zerthanalar, akt zaly, ashana jáne kitaphana bar. Ǵimarat internet jelisine qosylyp, elektrmen jylytý júiesi ornatylǵan, mektep aýmaǵy abattandyrylǵan.
Saltanatty ashylý rásiminde Shyǵys Qazaqstan oblysynyń ákimi Nurymbet Saqtaǵanov turǵylyqty jerine qaramastan, barlyq balaǵa sapaly bilim alýǵa teń múmkindik jasaýdyń mańyzdylyǵyn atap ótti. Sondai-aq óńir basshysy mektepke robototehnika kabinetin jabdyqtaýǵa arnalǵan sertifikat tabystady.
Aýyl turǵyndary úshin taǵy bir mańyzdy jańalyq – mektep janynan mektepke deiingi shaǵyn ortalyqtyń ashylýy. Buǵan deiin aýylda balabaqsha bolmaǵan. Qazir shaǵyn ortalyqqa alty bala barady. Búginde mektepte 26 qyzmetker jumys isteidi, onyń 13-i – pedagog. Mektep ákimshiliginiń málimetinshe, muǵalimderge degen qajettilik tolyq qamtamasyz etilgen. Mamandardy tartý maqsatynda jergilikti kásiporynnyń qoldaýymen eki páter satyp alynǵan. Sonyń nátijesinde balalary bar eki otbasy aýylǵa qonys aýdardy. Olardyń qatarynda fizika jáne tarih pánderiniń muǵalimderi bar.
Osylaisha, jańa mekteptiń ashylýy balalardyń bilim alý jaǵdaiyn jaqsartyp qana qoimai, mektepke deiingi tárbiemen qamtýǵa jáne aýylǵa bilikti mamandar tartýǵa múmkindik berdi. Qystaý-Kúrshim turǵyndary úshin bul – aýyldyń áleýmettik infraqurylymyn damytýǵa jáne halyqtyń ómir súrý sapasyn arttyrýǵa baǵyttalǵan mańyzdy qadam.
