Qazaqstanda tiri týǵan árbir myń nárestege shaqqandaǵy ólim kórsetkishi úsh jaǵdaidy qurady. Bul Ortalyq Aziia elderi arasyndaǵy eń tómengi kórsetkish, dep habarlaidy dalanews.kz.
Ministrliktiń málimetinshe, Qazaqstan BUU-nyń balalar ólimin azaitýǵa qatysty turaqty damý maqsattaryn merziminen buryn oryndaǵan. Sonymen qatar meditsinalyq kómektiń qoljetimdiligin arttyrý úshin elimizde 16 jańa balalar aýrýhanasy men perinataldyq ortalyq salý josparlanyp otyr.
Vedomstvonyń habarlaýynsha, búginde dene salmaǵy óte tómen bolyp týǵan nárestelerdiń ómir súrý kórsetkishi 57%-dy quraidy. Bul kórsetkishti arttyrý úshin mamandandyrylǵan meditsinalyq kómekti damytý jáne meditsinalyq uiymdardyń materialdyq-tehnikalyq bazasyn nyǵaitý kózdelgen.
Sondai-aq júktilik kezinde meditsinalyq baqylaýdy qamtamasyz etýge jáne týa bitken aýrýlardy erte anyqtaýǵa erekshe nazar aýdarylyp otyr.
Ministrliktiń málimetinshe, «Analar saýlyǵy» baǵdarlamasy aiasynda uryqtyń saýlyǵyn saqtaý ortalyqtarynyń 22-sinde bir kúndik klinikalar ashylyp, diagnostika men qursaqishilik emdeýdiń zamanaýi ádisteri engizilgen.
Nátijesinde týa bitken damý aqaýlaryn anyqtaý kórsetkishi 12%-ǵa artyp, osy sebepterge bailanysty náreste ólimi 15%-ǵa tómendegen.
