AQSh prezidenti Donald Tramp pen Ýkraina prezidenti Vladimir Zelenskii Aq úide jabyq kezdesý ótkizdi. Eki el basshysy Ýkrainadaǵy soǵysty toqtatýǵa baǵyttalǵan diplomatiialyq kelissózderdi qaita jandandyrý jáne Kievtiń áýe qorǵanysyn kúsheitý máselelerin talqylady, dep habarlaidy dalanews.kz.
Kezdesýden keiin Zelenskii kelissózdiń jaqsy ótkenin málimdedi. Onyń sózinshe, taraptar Ýkrainada Patriot áýe qorǵanys júiesine arnalǵan zymyrandardy litsenziia boiynsha óndirý jáne qorǵanys salasyndaǵy ózge de birlesken jobalardy júzege asyrý múmkindigin qarastyrǵan.
«Prezident ekeýmiz Patriot zymyrandaryn óndirýge arnalǵan litsenziialardy jáne kómektesýi múmkin birneshe basqa usynysty talqyladyq. Sonymen qatar diplomatiia týraly sóilestik. Diplomatiialyq protsesti jandandyrý mańyzdy», – dedi Zelenskii.
Ýkraina basshysy elge ballistikalyq zymyrandardan qorǵanýǵa múmkindik beretin júieler men qosymsha zymyrandardyń qajet ekenin atap ótti. Onyń aitýynsha, Kievtiń qorǵanys salasyndaǵy seriktestikti keńeitý jónindegi usynystaryn AQSh tarapy qarastyryp jatyr.
Zelenskii keiinirek Donald Tramptyń Ýkrainaǵa Patriot zymyrandaryn óndirýge qajetti litsenziia berýge keliskenin aitty. Qazirgi ýaqytta eki eldiń mamandary birlesken óndiristi múmkindiginshe tezirek iske qosý joldaryn pysyqtap jatyr.
Kezdesý taraptar arasyndaǵy qarym-qatynas jaqsaryp, Vashington men Kievtiń áskeri jáne diplomatiialyq baǵyttaǵy yntymaqtastyǵy qaita jandana bastaǵan tusta ótti.
