Tanymal zańger Jangeldi Súleimenov Qazaqstanda qabyldanǵan jańa Salyq kodeksiniń qoldanylýyn ýaqytsha toqtatýdy talap etti. Onyń aitýynsha, salyq reformasy is júzinde bastalmai jatyp-aq tyǵyryqqa tirelgen, dep habarlaidy Dalanews.kz.
Zańger jeltoqsan aiynda Qarjy ministrligi «Halyq býhgalteri» aktsiiasyn jariialaǵanyn eske saldy. Bul bastama jeke kásipkerler men shaǵyn bizneske salyq eseptiligin tapsyrý kezinde kómek kórsetý maqsatynda usynylǵan. Alaida, Súleimenovtiń aitýynsha, shyn máninde salyq organdary býhgalterlik firmalardan salyq tóleýshilerge keńes berý úshin qyzmetkerlerin tegin bólýin surap otyr.
Onyń sózinshe, bul jerde keminde úsh túbegeili másele bar.
Birinshiden, jańa Salyq kodeksinde salyq tóleýshilerge keńes berý mindeti tikelei salyq organdarynyń ózine júktelgen. Al jeke bizneske mundai mindet artylmaǵan. Memleket býhgalterlerdi kómekke shaqyrýǵa májbúr bolsa, bul salyq organdarynyń bilim, resýrs jáne ýaqyt jaǵynan daiyn emestigin kórsetedi.
Ekinshiden, zańger jeke býhgalterlik kompaniialar nege memlekettiń jumysyn tegin atqarýy tiis degen suraq qoiady. Onyń aitýynsha, keńes berý – salyq organynyń tikelei mindeti, al biznes úshin bul qaiyrymdylyq emes.
Úshinshiden, mundai keńesterdiń ózi salyq tóleýshiler úshin qaýipti bolýy múmkin. Sebebi býhgalter qatelik jiberse, jaýapkershilikti báribir salyq tóleýshiniń ózi kóteredi. Súleimenov býhgalterler deklaratsiia toltyrýdy jaqsy biletinin, alaida Salyq kodeksiniń jalpy, quqyqtyq bóligin ádette tek salyq daýlaryna mamandanǵan zańgerler meńgeretinin atap ótti.
Sonymen qatar ol salyq reformasy aiasynda aqparattyq júielerdiń de durys jumys istemei jatqanyn aitty. Eseptiliktiń qabyldanbaýy, derekterdiń «taralmai qalýy» siiaqty máseleler birneshe kúnniń ishinde-aq reformanyń toqyrai bastaǵanyn kórsetken.
«Ne bolatyny qazirdiń ózinde túsinikti. Sondyqtan men jańa Salyq kodeksiniń qoldanysyn toqtatýdy talap etemin. Bul reformaǵa ni salyq organdary, ni salyq tóleýshiler daiyn emes», – dedi zańger.
