Танымал заңгер Жангелді Сүлейменов Қазақстанда қабылданған жаңа Салық кодексінің қолданылуын уақытша тоқтатуды талап етті. Оның айтуынша, салық реформасы іс жүзінде басталмай жатып-ақ тығырыққа тірелген, деп хабарлайды Dalanews.kz.
Заңгер желтоқсан айында Қаржы министрлігі «Халық бухгалтері» акциясын жариялағанын еске салды. Бұл бастама жеке кәсіпкерлер мен шағын бизнеске салық есептілігін тапсыру кезінде көмек көрсету мақсатында ұсынылған. Алайда, Сүлейменовтің айтуынша, шын мәнінде салық органдары бухгалтерлік фирмалардан салық төлеушілерге кеңес беру үшін қызметкерлерін тегін бөлуін сұрап отыр.
Оның сөзінше, бұл жерде кемінде үш түбегейлі мәселе бар.
Біріншіден, жаңа Салық кодексінде салық төлеушілерге кеңес беру міндеті тікелей салық органдарының өзіне жүктелген. Ал жеке бизнеске мұндай міндет артылмаған. Мемлекет бухгалтерлерді көмекке шақыруға мәжбүр болса, бұл салық органдарының білім, ресурс және уақыт жағынан дайын еместігін көрсетеді.
Екіншіден, заңгер жеке бухгалтерлік компаниялар неге мемлекеттің жұмысын тегін атқаруы тиіс деген сұрақ қояды. Оның айтуынша, кеңес беру – салық органының тікелей міндеті, ал бизнес үшін бұл қайырымдылық емес.
Үшіншіден, мұндай кеңестердің өзі салық төлеушілер үшін қауіпті болуы мүмкін. Себебі бухгалтер қателік жіберсе, жауапкершілікті бәрібір салық төлеушінің өзі көтереді. Сүлейменов бухгалтерлер декларация толтыруды жақсы білетінін, алайда Салық кодексінің жалпы, құқықтық бөлігін әдетте тек салық дауларына маманданған заңгерлер меңгеретінін атап өтті.
Сонымен қатар ол салық реформасы аясында ақпараттық жүйелердің де дұрыс жұмыс істемей жатқанын айтты. Есептіліктің қабылданбауы, деректердің «таралмай қалуы» сияқты мәселелер бірнеше күннің ішінде-ақ реформаның тоқырай бастағанын көрсеткен.
«Не болатыны қазірдің өзінде түсінікті. Сондықтан мен жаңа Салық кодексінің қолданысын тоқтатуды талап етемін. Бұл реформаға ни салық органдары, ни салық төлеушілер дайын емес», – деді заңгер.
