2026 jyldan bastap kúshine engen jańa Salyq kodeksi Qazaqstandaǵy shaǵyn biznestiń edáýir bóligine tikelei emes, biraq júieli túrde áser etip otyr,dep habarlaidy Dalanews.kz.
Ásirese arnaiy salyq rejiminde jumys isteitin jeke kásipkerler úshin naryqtaǵy sharttar kúrdelene tústi.
Qazaq Expert Club sarapshysy, salyq konsýltanty Raýshan Tasshoinovanyń aitýynsha, jańa erejeler arnaiy salyq rejimderin qoldanatyn kásipkerlerdiń kúndelikti iskerlik tájiribesinde aiqyn sezile bastady. Ulttyq statistika biýrosynyń derekterine sáikes, jeke kásipkerler shaǵyn jáne orta biznes sýbektileriniń shamamen 70%-yn quraidy. Osyǵan bailanysty 2026 jyldyń basy biznes úshin beiimdelý kezeńine ainalǵan.
Sarapshynyń pikirinshe, ózgerister eń aldymen kompaniialar arasyndaǵy ózara esep aiyrysýǵa áser etip otyr. Jalpyǵa birdei belgilengen rejimdegi kásiporyndar úshin arnaiy salyq rejimindegi kontragenttermen jumys isteý burynǵydai tiimdi emes. Mundai mámilelerde qosylǵan qun salyǵy esepke jatqyzylmaidy, al korporativtik tabys salyǵy boiynsha shegerimder shektelgen.
Raýshan Tasshoinova mundai jaǵdailarda ekonomikalyq aiyrmashylyq qosylǵan qun salyǵynyń mólsherlemesine jýyqtaitynyn aitady. Saýda salasynda ortasha marja kóbine 10–15% aralyǵynda ekenin eskersek, qosymsha salyqtyq júkteme paidanyń edáýir bóligin azaitýy múmkin. Sonyń saldarynan kompaniialar jetkizý tizbekterin qaita qarap, kontragentter qurylymyn ózgertýge májbúr.
Tájiribede jii kezdesetin mysaldardyń biri – kólik qyzmetteri. Arnaiy salyq rejimindegi tasymaldaýshy jalpyǵa birdei rejimdegi kompaniiaǵa qyzmet kórsetken jaǵdaida, tapsyrys berýshi úshin mundai kelisim tiimsiz bolady. Sebebi tólengen qosylǵan qun salyǵy esepke alynbaidy, al korporativtik tabys salyǵy boiynsha shegerimderge shekteý qoiylady. Nátijesinde tapsyrys berýshi baǵany tómendetýdi talap etedi nemese jalpy rejimdegi tasymaldaýshyny izdeidi. Al shaǵyn tasymaldaýshy marjasynyń qysqarýyna nemese korporativtik klientinen aiyrylý qaýpine tap bolady.
Osyndai qysymnyń nátijesinde biznes sharttardy qaita qaraýǵa, jumys formatyn ózgertýge jáne qosymsha shyǵyndardy qyzmet pen taýar baǵasyna ishinara engizýge májbúr bolyp otyr. Sarapshynyń baǵalaýynsha, keibir B2B segmentterinde baǵanyń ósýi baiqalady. Bul úderis salyqtyq ózgerister men jalpy infliatsiialyq qysymnyń qatar áser etýimen bailanysty.
Ózgerister ásirese saýda, logistika, qurylys jáne servistik merdigerlik salalarda aiqyn seziledi. Bul segmentterde jetkizý tizbekteri uzyn, al ózara esep aiyrysýda qosylǵan qun salyǵynyń úlesi joǵary. Shaǵyn jáne orta biznes eldiń jalpy ishki óniminiń úshten birinen astamyn qalyptastyratynyn eskersek, salyq logikasyndaǵy bul ózgerister jekelegen kásiporyndarmen shektelmei, baǵa qalyptastyrýǵa, jumyspen qamtýǵa jáne jalpy iskerlik belsendilikke yqpal etip otyr.
Raýshan Tasshoinovanyń aitýynsha, jańa jaǵdaida jalpyǵa birdei rejimdegi kompaniialar utady, al arnaiy rejimdegi biznes korporativtik tapsyrystardyń bir bóligin joǵaltý qaýpine tap bolýda. Qosylǵan qun salyǵy boiynsha esepke turý belsendiliginiń artqany, sondai-aq kásiporyndardyń bir bóliginiń jalpy rejimge kóshe bastaǵany baiqalady.
Osylaisha, salyq rejimi endi tek esep júrgizýdiń tehnikalyq tetigi emes, naryqqa qoljetimdilikti aiqyndaityn faktorǵa ainaldy. Shaǵyn biznes úshin másele salyq júktemesiniń kóleminde ǵana emes, kimmen jumys istei alatynynda jáne qandai kelisimsharttardy saqtap qala alatynynda bolyp otyr.
