Jańaózendegi bir top munaishy belsendi Muratbai Jumaǵalievti qamaýdan bosatýdy talap etip, talap oryndalmaǵan jaǵdaida jumysty tolyq toqtatýy múmkin ekenin málimdedi, dep habarlaidy dalanews.kz.
«Jumysty tolyq toqtatamyz»
Áleýmettik jelide taraǵan videoda munaishylardyń biri Jumaǵalievke qatysty qýdalaýdy synǵa alyp, onyń ústinen qozǵalǵan iske kúmán keltirgen. Onyń aitýynsha, belsendi Astanaǵa emdelýge bara jatqan kezde ustalǵan.
– Jumaǵaliev ózine qarsy jasalyp jatqan áreketterden keiin Astanaǵa emdelýge bara jatqan. Sol kezde qaltasyna esirtki salyp, qamaýǵa aldy. Budan kim saqtandyrylǵan? Bul – bizdiń eskertýimiz. Eger Muratbaidy qamaýdan shyǵarmasa, erteń jumysty tolyq toqtatamyz, – dedi jumysshylardyń biri videoda.
Buǵan deiin belsendi Muratbai Jumaǵalievtiń ustalǵany belgili bolǵan edi. Áleýmettik jelide taraǵan kadrlarda onyń ustalý kezinde «bul – arandatý» dep aiqailap, «muny qaltama salyp jiberdi» degeni estiledi.
Qandai bap boiynsha is qozǵaldy?
Belsendiniń advokaty Aigúl Aijaryqova «Vlast» basylymyna bergen pikirinde Jumaǵalievke qatysty asa iri kólemdegi esirtki quraldarynyń zańsyz ainalymyna qatysty qylmystyq is qozǵalǵanyn aitty.
Onyń sózinshe, is Qazaqstan Qylmystyq kodeksiniń 296-baby 4-bóligi boiynsha tergelip jatyr. Atalǵan bap sanktsiiasy úsh jyldan jeti jylǵa deiin bas bostandyǵynan aiyrý jazasyn qarastyrady.
Aita keteiik, ázirge quqyq qorǵaý organdary munaishylardyń málimdemesine jáne belsendiniń ózine taǵylǵan aiyptarǵa qatysty resmi túsinikteme bergen joq.
