Kásipker Muhtar Jákishev qyzynyń sheteldik jigitke turmysqa shyǵýyna qatysty pikir bildirdi, dep habarlaidy dalanews.kz.
5 maýsym kúni qyzy Altynaidyń uzatý toiy ótken bolatyn. Jákishevtiń qyzy qara násildi sheteldik jigitke turmysqa shyqty. Bul toi áleýmettik jelide qyzý talqyǵa túsip, qoǵam Jákishevti synaǵan bolatyn. Kásipkerdiń qyzy Jákishev sottalǵannan keiin shetelge kóship, bilim alǵan.
Árbir áke úshin orny bólek, erekshe kún. Uiadan ushqan kip-kishkentai qyzyńnyń eseiip, boijetkenin jáne ómir jolyn birge júrip ótetin serigin tańdaǵanyn ishtei moiyndap, tebirenetin sát. Men Altynai úshin sheksiz baqyttymyn. Bul tańdaý kezdeisoq nemese asyǵys jasalǵan joq. Onyń negizinde shynaiy, pák mahabbat jatyr. Karl ekeýi alty jyldan beri tanys. Osydan eki jyl buryn Karl Almatyǵa arnaiy kelip, aldymnan ótti. Men óz batamdy berdim, - deidi kásipker.
Muhtar Jákishev kúieýbalasyna jeke toqtaldy.
Karl maǵan unaidy. Onyń azamattyq ustanymy durys, aldyna qoiǵan maqsattary aiqyn ári aýqymdy. Onyń eńbekqorlyǵyna, bilimine jáne alǵan betinen qaitpaityn qaisarlyǵyna qarap, kózdegen shyńdaryn baǵyndyratynyna kámil senemin. Biraq men úshin eń mańyzdysy – qyzymdy shyn júrekten, tereń ári názik sezimmen súietini.
Kásipker úlken qyzy turmysqa shyqqanda túrmede otyrǵan.
Bul toidyń máni men úshin tym bólek. Úlken qyzym turmysqa shyqqanda men túrmede otyrdym. Ol kezde áke retinde qolymnan bar kelgeni Aigerimime arnaǵan aq tilegimdi qaǵazǵa túsirip, hatpen berip jiberý ǵana boldy. Sol hat toiynda oqyldy. Al búgin bári basqasha. Qyzyńnyń qýanyshynda qaǵazdaǵy qurǵaq sózben shektelmei, sózi qaǵazdan ǵana oqylatyn adam bolmaýdyń ózi bir ǵanibet. Qyzyńdy óziń uzatyp, osynaý ómirlik mańyzy bar aq bosaǵadan attar sátinde Altynaiyńa júrekjardy jyly sózderińdi óziń aita alýyń netken baqyt! Meni tutqyndaǵanda Altynai ne bary 9 jasta ǵana edi. Bostandyqqa shyqqanymda ol jiyrmaǵa tolypty. Ol mensiz eseidi, - deidi kásipker.
Jákishev qyzyn bala kúninen qysymnan qutqarý úshin shetelge jiberdik deidi.
Ol bala kúninde-aq, meni januiamyz arqyly kórsetiletin qysymnan qutqarý úshin, týǵan úiin tastap jat jerge ketýge májbúr boldy, bóten elde ósti. Ata-anasynyń aialy alaqany men meiirimine bólenip otyrǵan balanyń kenetten úiinen jyraqtap, jat tilde sóileitin bóten adamdar oqityn mektep-internattan bir-aq shyqqanyn túsiný qiyn. Biraq ol synbady, bárine tótep berdi. Mektepti, artynsha ýniversitetti bitirdi. Kásibi jýrnalist, tabysty model retinde tulǵa bolyp qalyptasty, - deidi ol.
Kásipker ózin synaǵandarǵa jeke toqtalǵan. Jazbasynda Jákishev qudalaryn maqtap, dástúrin dáriptegen.
Al keibir qisynsyz, orynsyz pikir jazyp jatqandar tek aianysh pen jiirkenish sezimin týǵyzady. Naǵyz namys kúieý balanyń ultymen ólshenbeidi. Namys degenimiz sol namys úshin tym joǵary baǵa tóleýge týra kelgende, adamdyq aryń men abyroiyńdy taza saqtap qala alýyńmen ólshenedi! Ulttyń jamany bolmaidy. Jaman adamdar bolady. Qalǵan dúnieniń bári osy qarapaiym qaǵidanyń saldary ǵana. Ar-ujdanyn mansapqa aiyrbastap, maǵan qarsy isti qoldan qurastyrǵan tergeýshilerdiń, prokýrorlar men sýdialardyń ishinde birde-bir sheteldik bolǵan joq. Meni sondai «qudalardan» saqtaǵan Jaratqanǵa myń shúkir, - deidi kásipker.
Eske salaiyq, qazaqstandyq kásipker Muhtar Jákishevtiń qyzy Altynai Jákisheva sheteldik jigitke turmysqa shyqqan bolatyn.
Altynai Jákisheva 1999 jyly dúniege kelgen. Ol modeldik mansappen ainalysady, qazirgi ýaqytta Londonda turyp, jumys isteidi.
