Qazaqstandyq tennisshi Elena Rybakina mansabynda alǵash ret AQSh ashyq chempionatynyń jeńimpazy atandy. Ol Niý-Iorkte ótken US Open finalynda Belarýs ókili Arina Sobolenkony jeńdi, dep habarlaidy dalanews.kz.
Finaldyq kezdesýde Rybakina qarsylasyn 6:4, 5:7, 6:2 esebimen utty. Tennisshiler kortta 2 saǵat 23 minýt oiyn kórsetti.
Match barysynda qazaqstandyq sportshy 12 eis jasap, bes ret qosarlanǵan qatelik jiberdi. Sondai-aq 12 breik-pointtyń úsheýin sátti paidalandy.
Osylaisha, Elena Rybakina mansabyndaǵy úshinshi «Úlken dýlyǵa» júldesin ielendi. Qazaqstandyq tennisshiniń buǵan deiingi iri jeńisteri 2022 jylǵy Ýimbldon jáne 2026 jylǵy Australian Open týrnirlerinde tirkelgen.
Rybakina úshin 2026 jyl erekshe tabysty ótip jatyr. Maýsym basynda ol Australian Open týrnirinde chempion atansa, endi AQSh ashyq chempionatynda da top jardy.
Sonymen qatar bul jeńis qazaqstandyq tennisshige álemdik reitingte tarihi nátijege qol jetkizýge múmkindik berdi. Elena Rybakina dúisenbi kúni WTA reitinginde alǵash ret álemniń birinshi raketkasy atanady. Bul – Qazaqstan tennisi tarihyndaǵy tuńǵysh kórsetkish.
Arina Sobolenko úshin de bul final erekshe boldy. Belarýs tennisshisi US Open-niń byltyrǵy chempiony edi. Alaida biylǵy sheshýshi kezdesýde Rybakina basym tústi.
Osy jeńisten keiin Rybakinanyń Sobolenkoǵa qarsy WTA týrnirlerindegi finaldyq kezdesýlerdegi jalpy esebi 5:2 boldy.
Elena Rybakinanyń «Úlken dýlyǵa» týrnirlerindegi jeńisteri:
- Ýimbldon – 2022;
- Australian Open – 2026;
- US Open – 2026.
