Qazaqstannyń áielder arasyndaǵy jekelei syndaǵy birinshi raketkasy Elena Rybakina Áielder tennisi qaýymdastyǵynyń (WTA) álemdik reitinginde resmi túrde kósh bastady, dep habarlaidy dalanews.kz.
Reiting jańartylǵannan keiin qazaqstandyq tennisshiniń enshisinde 9 901 upai bar. Rybakina ekinshi orynnan birinshi orynǵa kóterilip, 7 875 upaimen ekinshi satyda turǵan Arina Sobolenkodan ozdy. Tennisshiler arasyndaǵy aiyrmashylyq 2 026 upaidy quraidy. Úzdik úshtikti amerikalyq Djessika Pegýla 7 265 upaimen túiindep tur.
Birinshi oryn úshin kúreste sheshýshi týrnir US Open-2026 boldy. Qytailyq Chjen Tsinvendi jeńip, jartylai finalǵa shyǵýy Rybakinaǵa týrnirdiń keiingi nátijelerine qaramastan álemdik reitingtegi kóshbasshylyqty qamtamasyz etti. US Open bastalǵan kezde birinshi orynǵa Arina Sobolenko, Djessika Pegýla jáne Koko Gaýff ta talasqan bolatyn.
Keiin Rybakina álemniń birinshi raketkasy mártebesin ielenip qana qoimai, týrnirdi chempiondyq ataqpen aiaqtady. Finalda ol Arina Sobolenkony 6:4, 5:7, 6:2 esebimen jeńdi. Bul Elenanyń US Open týrnirindegi alǵashqy jáne mansabyndaǵy «Úlken dýlyǵa» jarystaryndaǵy úshinshi titýly boldy.
Osylaisha, 27 jastaǵy Elena Rybakina WTA tarihynda álemdik reitingtiń birinshi satysyna kóterilgen 30-shy tennisshi atandy. Sondai-aq ol erler men áielder arasynda jekelei synda álemdik reitingti basqarǵan Qazaqstannyń tuńǵysh ókili boldy.
