Almaty oblysy biyl memlekettik biýdjetke salyqtar men basqa da mindetti tólemderden 1,5 trln teńge túsirýdi josparlap otyr, dep habarlaidy Dala News.
Bul – óńir tarihyndaǵy eń joǵary kórsetkish. Byltyr oblys alǵash ret memlekettik biýdjetke 1,1 trln teńgeden astam túsim qamtamasyz etti. Onyń ishinde respýblikalyq biýdjetke 490,5 mlrd teńge, jergilikti biýdjetke 628,6 mlrd teńge túsken.
Salyq túsimderiniń turaqty ósýi óńir ekonomikasynyń da qarqyndy damyp kele jatqanyn kórsetedi. Sonyń bir kórinisi – oblystyq biýdjetke qarjy aýdaratyn donor aýmaqtar sanynyń artýy.
Almaty oblysy qaita qurylǵanǵa deiin Ile jáne Qarasai aýdandary ǵana donor bolsa, qazir olardyń qataryna Talǵar, Eńbekshiqazaq jáne Jambyl aýdandary, sondai-aq Qonaev pen Alataý qalalary qosyldy. Osylaisha oblystaǵy donor aýmaqtar sany 2-den 7-ge jetti.
Donor aýmaqtardyń kóbeiýine jańa óndiristerdiń iske qosylýy, investitsiia kóleminiń artýy jáne kásipkerliktiń damýy áser etken. Sońǵy jyldary oblysta KT&G, PepsiCo, TehnoNIKOL jáne «Jetisý Volframdary» siiaqty iri kompaniialardyń jańa óndiristik jobalary iske qosyldy.
Sondai-aq Ile aýdanynda FMK men JTI kásiporyndarynyń óndiristik qýattaryn keńeitýi salyq túsimderiniń ósýine yqpal etken.
Almaty oblysynyń Ekonomika jáne biýdjettik josparlaý basqarmasynyń basshysy Asylan Orazdyń aitýynsha, donor aýdandardyń sany ǵana emes, olardyń oblystyq biýdjetke aýdaratyn qarajaty da kóbeiip keledi.
«2024 jyly donor aýdandardan oblystyq biýdjetke 276,5 mlrd teńge tústi. 2025 jyly bul kórsetkish 292,5 mlrd teńgege jetti. Al 2026 jyldyń alǵashqy alty aiynda 241,9 mlrd teńge tústi. Biylǵy jyldyq jospar – 542,6 mlrd teńge. Eń kóp túsim túsiretin aýdan – Ile aýdany. Byltyr aýdan oblystyq biýdjetke 249,3 mlrd teńge aýdarsa, biylǵy jyldyń birinshi jartyjyldyǵynda 165,2 mlrd teńge tústi. Bul oblystyq biýdjet kiristeriniń 42,4 paiyzyn quraidy», – dedi Asylan Oraz.
Salyq túsimderiniń qazirgi ósim qarqyny saqtalsa, Almaty oblysy 2029 jylǵa qarai respýblikalyq biýdjetke qarjy aýdaratyn donor óńir mártebesin alýy múmkin.
