Almaty turǵyny jyljymaityn múlik nysanyn bir jylǵa jýyq keshiktirip tapsyrǵan qurylys kompaniiasyn sotqa berip, 10,5 mln teńge kóleminde ótemaqy óndirip aldy, dep habarlaidy dalanews.kz.
Nege.kz málimetinshe, er adam 2021 jyly qurylys kompaniiasymen páter, kommertsiialyq úi-jai jáne avtoturaq orny boiynsha úsh aldyn ala kelisimshart jasasqan. Ol múliktiń qunyn tolyq tólegen. Kelisimge sáikes, qurylys 2023 jyldyń sońyna deiin aiaqtalyp, negizgi satyp alý-satý sharttary rásimdelýge tiis bolǵan.
Alaida nysan tek 2024 jyldyń qazan aiynda paidalanýǵa berilgen. Qabyldaý-tapsyrý aktilerine 2025 jyldyń qańtarynda qol qoiylsa, satyp alý-satý sharttary naýryz aiynda ǵana rásimdelgen.
Osyǵan bailanysty satyp alýshy qurylys kompaniiasynan merzimniń keshiktirilgeni úshin turaqsyzdyq aiybyn óndirip alýdy talap etken. Birinshi jáne apelliatsiialyq satydaǵy sottar onyń talabyn qanaǵattandyrmaǵan. Alaida kassatsiialyq sot buǵan deiin qabyldanǵan sheshimdermen kelispedi.
Sottyń túsindirýinshe, negizgi sharttardyń keiinnen jasalýy qurylys kompaniiasyn oǵan deiin jiberilgen zań buzýshylyqtar úshin jaýapkershilikten bosatpaidy. Kelisim talaptarynda ár keshiktirilgen kún úshin jyljymaityn múlik qunynyń 0,1 paiyzy mólsherinde, biraq jalpy somanyń 10 paiyzynan aspaityn turaqsyzdyq aiyby qarastyrylǵan.
Nátijesinde tómengi satydaǵy sottardyń sheshimderi kúshin joiyp, qurylys kompaniiasynan satyp alýshynyń paidasyna 10,5 mln teńge óndirildi.
