QR Májilisiniń depýtaty Jarqynbek Amantai blogerlerdiń áleýmettik jelidegi áreketterin synap, premer-ministrdiń orynbasary Tamara Dúisenovaǵa saýal joldady. Depýtattyń aitýynsha, búginde áleýmettik jeliler jalǵan aqparat, alaiaqtyq pen orynsyz bopsalaýdyń alańyna ainalǵan, dep habarlaidy Dalanews.kz.
Depýtat Atyraýda bolǵan qaiǵyly oqiǵany mysalǵa keltirdi. Onda bloger kúzetshiniń ar-namysyn taptap, nátijesinde azamattyń júregi toqtap qalǵan. Depýtattyń pikirinshe, bul jaǵdai - blogerlerdiń jaýapkershiligi men áleýmettik jelilerde jariialanǵan kontenttiń ziiandy áserin kórsetedi.
“Qoǵamdyq tártipke baǵynýǵa shaqyrǵan kúzetshiniń ar-namysyn aiaýsyz taptaǵan blogersymaqtyń áreketinen soń azamattyń qan qysymy kóterilip, júregi toqtap qaldy. Sóz-súiekten ótedi. Aqyry orynsyz daraqylyqtyń saldarynan bir áýlet qara jamyldy”, – dep atap ótti ol.
Depýtat sonymen qatar áleýmettik jelilerdegi sapasyz bilim men arzan aqyl satýshylardyń kóbeiýine de alańdaýshylyq bildirdi. Qazirgi tańda áleýmettik jelilerde “baqytqa jetý”, “jyldam baiý” nemese “kúizelisten qutylý” sekildi kýrstar men treningterge jarnama jasap júrgen blogerler men koýchtar halyqty aldap, olarǵa joǵary baǵamen sabaq satýda.
“Olardy aýyzeki tilde “infosyǵandar” dep ataidy. Olardyń júzdegen myń teńgege baǵalanǵan sabaqtaryn jurt tipti nesie rásimdep satyp alyp, keiin qaryzǵa belshesinen batyp qalǵany da jasyryn emes”, – dep qosty ol.
Depýtat bulardyń eshbir súzgi men qadaǵalaýdan tys ótkizip júrgen sabaqtarynyń kesirinen talai otbasynyń shańyraǵy ortasyna túskenin aitady.
“Qariianyń biraýyz sózi elińdi, keiýananyń bir aýyz sózi kelindi tárbielegen. Óz taǵdyryn túzei almaǵandar ózgeniń kieli tabaldyryǵyna tórelik aityp baǵýda”, – dep atap ótti depýtat.
Onyń aitýynsha, elimizdegi infobiznestiń jyldyq ainalymy 500 million AQSh dollaryn quraidy. Al aldaǵy 5 jylda bul kórsetkish 2 milliard dollarǵa jetýi múmkin. Amantai buǵan qosa, infosyǵandardan mezi bolǵan jurtshylyq olarǵa tyiym salý maqsatynda 2023 jyly 23 qarashada petitsiia jariialaǵanymen, bul másele qaraýsyz qalǵanyn atap ótti.
Depýtat qazirgi blogerler men áleýmettik jelilerdiń qoǵamdaǵy róline alańdaýshylyq bildirip, saýal joldady, sondai-aq halyqty qorǵaý sharalaryn qolǵa alý qajet ekenin atap ótti. Amantaidyń pikirinshe, qoǵamdy qorǵaý úshin blogerlerdiń jaýapkershiligin arttyrý, sonymen qatar olardyń qyzmetine baqylaý ornatý qajet.
