ق ر ءماجىلىسىنىڭ دەپۋتاتى جارقىنبەك امانتاي بلوگەرلەردىڭ الەۋمەتتىك جەلىدەگى ارەكەتتەرىن سىناپ، پرەمەر-مينيستردىڭ ورىنباسارى تامارا دۇيسەنوۆاعا ساۋال جولدادى. دەپۋتاتتىڭ ايتۋىنشا، بۇگىندە الەۋمەتتىك جەلىلەر جالعان اقپارات، الاياقتىق پەن ورىنسىز بوپسالاۋدىڭ الاڭىنا اينالعان، دەپ حابارلايدى Dalanews.kz.
دەپۋتات اتىراۋدا بولعان قايعىلى وقيعانى مىسالعا كەلتىردى. وندا بلوگەر كۇزەتشىنىڭ ار-نامىسىن تاپتاپ، ناتيجەسىندە ازاماتتىڭ جۇرەگى توقتاپ قالعان. دەپۋتاتتىڭ پىكىرىنشە، بۇل جاعداي - بلوگەرلەردىڭ جاۋاپكەرشىلىگى مەن الەۋمەتتىك جەلىلەردە جاريالانعان كونتەنتتىڭ زياندى اسەرىن كورسەتەدى.
“قوعامدىق تارتىپكە باعىنۋعا شاقىرعان كۇزەتشىنىڭ ار-نامىسىن اياۋسىز تاپتاعان بلوگەرسىماقتىڭ ارەكەتىنەن سوڭ ازاماتتىڭ قان قىسىمى كوتەرىلىپ، جۇرەگى توقتاپ قالدى. سوز-سۇيەكتەن وتەدى. اقىرى ورىنسىز داراقىلىقتىڭ سالدارىنان ءبىر اۋلەت قارا جامىلدى”، – دەپ اتاپ ءوتتى ول.
دەپۋتات سونىمەن قاتار الەۋمەتتىك جەلىلەردەگى ساپاسىز ءبىلىم مەن ارزان اقىل ساتۋشىلاردىڭ كوبەيۋىنە دە الاڭداۋشىلىق ءبىلدىردى. قازىرگى تاڭدا الەۋمەتتىك جەلىلەردە “باقىتقا جەتۋ”، “جىلدام بايۋ” نەمەسە “كۇيزەلىستەن قۇتىلۋ” سەكىلدى كۋرستار مەن ترەنينگتەرگە جارناما جاساپ جۇرگەن بلوگەرلەر مەن كوۋچتار حالىقتى الداپ، ولارعا جوعارى باعامەن ساباق ساتۋدا.
“ولاردى اۋىزەكى تىلدە “ينفوسىعاندار” دەپ اتايدى. ولاردىڭ جۇزدەگەن مىڭ تەڭگەگە باعالانعان ساباقتارىن جۇرت ءتىپتى نەسيە راسىمدەپ ساتىپ الىپ، كەيىن قارىزعا بەلشەسىنەن باتىپ قالعانى دا جاسىرىن ەمەس”، – دەپ قوستى ول.
دەپۋتات بۇلاردىڭ ەشبىر سۇزگى مەن قاداعالاۋدان تىس وتكىزىپ جۇرگەن ساباقتارىنىڭ كەسىرىنەن تالاي وتباسىنىڭ شاڭىراعى ورتاسىنا تۇسكەنىن ايتادى.
“قاريانىڭ ءبىراۋىز ءسوزى ەلىڭدى، كەيۋانانىڭ ءبىر اۋىز ءسوزى كەلىندى تاربيەلەگەن. ءوز تاعدىرىن تۇزەي الماعاندار وزگەنىڭ كيەلى تابالدىرىعىنا تورەلىك ايتىپ باعۋدا”، – دەپ اتاپ ءوتتى دەپۋتات.
ونىڭ ايتۋىنشا، ەلىمىزدەگى ينفوبيزنەستىڭ جىلدىق اينالىمى 500 ميلليون اقش دوللارىن قۇرايدى. ال الداعى 5 جىلدا بۇل كورسەتكىش 2 ميلليارد دوللارعا جەتۋى مۇمكىن. امانتاي بۇعان قوسا، ينفوسىعانداردان مەزى بولعان جۇرتشىلىق ولارعا تىيىم سالۋ ماقساتىندا 2023 جىلى 23 قاراشادا پەتيسيا جاريالاعانىمەن، بۇل ماسەلە قاراۋسىز قالعانىن اتاپ ءوتتى.
دەپۋتات قازىرگى بلوگەرلەر مەن الەۋمەتتىك جەلىلەردىڭ قوعامداعى رولىنە الاڭداۋشىلىق ءبىلدىرىپ، ساۋال جولدادى، سونداي-اق حالىقتى قورعاۋ شارالارىن قولعا الۋ قاجەت ەكەنىن اتاپ ءوتتى. امانتايدىڭ پىكىرىنشە، قوعامدى قورعاۋ ءۇشىن بلوگەرلەردىڭ جاۋاپكەرشىلىگىن ارتتىرۋ، سونىمەن قاتار ولاردىڭ قىزمەتىنە باقىلاۋ ورناتۋ قاجەت.
