Iana Legkodimovanyń ólimine qatysty video jariialandy, dep habarlaidy Dalanews.kz.
23 jastaǵy Iana Legkodimova 2024 jyly 19 qazanǵa qaraǵan túni óltirilgen. Qyzdyń súiegi segiz ai ótken soń Jaiyq ózeniniń jaǵasynan tabyldy.
"Birinshi adam joǵalý deregimen is tirkeldi. Habar túsken boida ony izdeýge kiristik. Birqatar jumys atqaryldy. Adam urlanǵany jóninde málimetter jinaqtalǵan soń isti adam urlaý deregi boiynsha júrgizdik. Odan soń is kisi óltirý deregine ózgertildi", - dedi Atyraý oblysy kriminaldyq politsiia basqarmasynyń bólim bastyǵy Erlan Qusaiynov.
20 qazanda politsiiaǵa qyzdyń anasynan onyń habar-osharsyz ketkeni jóninde habar túsken. Tártip saqshylary Iananyń túr-sipatyna, erekshelikterine qarai suraý salyp, izdestirý jumystaryn júrgizgen.
"Onyń úiden shyqqan sátinen bastap júrgen baǵytyn qalpyna keltire bastadyq. Kameralar qyz mingen aq tústi kólikti kórsetti. Janynda esikti ustap turǵan ekinshi er adam bolǵan. Keiin ol da kólikke otyrǵan. Odan soń olar Taldykólge qarai baǵyt alǵan", - dedi Atyraý oblysy PD tergeý basqarmasynyń asa mańyzdy ister jónindegi tergeýshisi Temirhan Hajmuratov.
Qaladaǵy beinekameralardyń jazbalary qaralyp, kúdikti kóliktiń júrý baǵyty tekserilgen. Osylaisha qyzdy alyp ketken eki er adam anyqtalǵan. Biri qylmysty óz qolymen jasasa, ekinshisi oǵan qylmys izin jasyrýǵa kómektesken.
"Kúdiktiler eki kúnnen keiin ustaldy. Biri Qurmanǵazy aýdanyna ketip úlgergen, ekinshisi kólikti jýatyn orynǵa aparyp, izderdi jáne marqumnyń telefonyn joiǵan", - dedi tergeýshi Hajmuratov.
Tergeý materialdaryna sáikes Hairjanov kóliktiń ishinde Ianany tunshyqtyrǵan, al dosy Qatimov qyz qashyp ketpesin dep esikti ustap turǵan. Budan keiin olar súiekti qala syrtyna aparyp, ózenge laqtyrǵan.
"Aldymen Hairjanovty anyqtadyq. Onyń jaýaby boiynsha ekinshi kúdikti Qatimovty taptyq. Kúdiktiler ustalyp, biraq súiek tabylmaǵany tájiribemde alǵash ret boldy. Soǵan qaramastan kúdiktiniń sózi boiynsha qylmys bolǵan oryndy anyqtadyq", - dedi Erlan Qusaiynov.
Qylmysker men marqum bir ýniversitette oqyǵan jáne birin-biri 2022 jyldan beri bilgen. Qyz-jigit retinde qarym-qatynasta bolǵan. Qaskóiler buryn-sońdy sotty bolmaǵan, qandai da bir esepte turmaǵan. Jedel ýákildiń aiytýynsha, mundai jaǵdailarda usaq-túiektiń ózin eskerý mańyzdy.
"Qylmys tirkelgen ýaqytta jedel ýákil usaq túiek mán-jailarǵa nazar aýdarady. Ony eskermeseń, qylmys ashylmai qalýy múmkin. Adamnyń sóilegenine nazar aýdaramyz. Psihologiialyq jaǵdaiyna mán beremiz. Kúdiktini sóiletýge tyrysamyz", - deidi jedel ýákil.
IIM málimetinshe, qylmys jasalýyna Iananyń Hairjanov basqa qyzben kezdesip júrgenin jáne oǵan úilenbek ekenin bilip qoiýy, qalyńdyǵyna shyndyqty aitamyn dep oqtalýy túrtki bolǵan. Tergeýshiniń aitýynsha, basty kúdikti áýelde tergeýdi shatastyrýǵa tyrysqan. Alaida tártip saqshylary taktikany ózgertip, qylmyskerdiń jaýapkershilikten jaltarýyna jol bermegen.
"Sot sanktsiiasy boiynsha biz olardyń paraqshalaryn tekserdik. Hat almasý barysynda olar kisi óltirý josparyn talqylaǵan. Sondai-aq, ǵalamtordaǵy izdeý júiesinde Qazaqstanda adam óltirý úshin qandai jaýapkershilik qarastyrylatyny jáne beinebaqylaý kameralaryndaǵy jazbalar qansha ýaqyt saqtalatyny týraly suraqtar bolǵan", - dedi tergeýshi Temirhan Hajmuratov.
