يانا لەگكوديموۆانىڭ ولىمىنە قاتىستى ۆيدەو جاريالاندى، دەپ حابارلايدى Dalanews.kz.
23 جاستاعى يانا لەگكوديموۆا 2024 جىلى 19 قازانعا قاراعان ءتۇنى ولتىرىلگەن. قىزدىڭ سۇيەگى سەگىز اي وتكەن سوڭ جايىق وزەنىنىڭ جاعاسىنان تابىلدى.
"ءبىرىنشى ادام جوعالۋ دەرەگىمەن ءىس تىركەلدى. حابار تۇسكەن بويدا ونى ىزدەۋگە كىرىستىك. ءبىرقاتار جۇمىس اتقارىلدى. ادام ۇرلانعانى جونىندە مالىمەتتەر جيناقتالعان سوڭ ءىستى ادام ۇرلاۋ دەرەگى بويىنشا جۇرگىزدىك. ودان سوڭ ءىس كىسى ءولتىرۋ دەرەگىنە وزگەرتىلدى"، - دەدى اتىراۋ وبلىسى كريمينالدىق پوليسيا باسقارماسىنىڭ ءبولىم باستىعى ەرلان قۇسايىنوۆ.
20 قازاندا پوليسياعا قىزدىڭ اناسىنان ونىڭ حابار-وشارسىز كەتكەنى جونىندە حابار تۇسكەن. ءتارتىپ ساقشىلارى يانانىڭ ءتۇر-سيپاتىنا، ەرەكشەلىكتەرىنە قاراي سۇراۋ سالىپ، ىزدەستىرۋ جۇمىستارىن جۇرگىزگەن.
"ونىڭ ۇيدەن شىققان ساتىنەن باستاپ جۇرگەن باعىتىن قالپىنا كەلتىرە باستادىق. كامەرالار قىز مىنگەن اق ءتۇستى كولىكتى كورسەتتى. جانىندا ەسىكتى ۇستاپ تۇرعان ەكىنشى ەر ادام بولعان. كەيىن ول دا كولىككە وتىرعان. ودان سوڭ ولار تالدىكولگە قاراي باعىت العان"، - دەدى اتىراۋ وبلىسى پد تەرگەۋ باسقارماسىنىڭ اسا ماڭىزدى ىستەر جونىندەگى تەرگەۋشىسى تەمىرحان حاجمۇراتوۆ.
قالاداعى بەينەكامەرالاردىڭ جازبالارى قارالىپ، كۇدىكتى كولىكتىڭ ءجۇرۋ باعىتى تەكسەرىلگەن. وسىلايشا قىزدى الىپ كەتكەن ەكى ەر ادام انىقتالعان. ءبىرى قىلمىستى ءوز قولىمەن جاساسا، ەكىنشىسى وعان قىلمىس ءىزىن جاسىرۋعا كومەكتەسكەن.
"كۇدىكتىلەر ەكى كۇننەن كەيىن ۇستالدى. ءبىرى قۇرمانعازى اۋدانىنا كەتىپ ۇلگەرگەن، ەكىنشىسى كولىكتى جۋاتىن ورىنعا اپارىپ، ىزدەردى جانە مارقۇمنىڭ تەلەفونىن جويعان"، - دەدى تەرگەۋشى حاجمۇراتوۆ.
تەرگەۋ ماتەريالدارىنا سايكەس حايرجانوۆ كولىكتىڭ ىشىندە يانانى تۇنشىقتىرعان، ال دوسى قاتيموۆ قىز قاشىپ كەتپەسىن دەپ ەسىكتى ۇستاپ تۇرعان. بۇدان كەيىن ولار سۇيەكتى قالا سىرتىنا اپارىپ، وزەنگە لاقتىرعان.
"الدىمەن حايرجانوۆتى انىقتادىق. ونىڭ جاۋابى بويىنشا ەكىنشى كۇدىكتى قاتيموۆتى تاپتىق. كۇدىكتىلەر ۇستالىپ، ءبىراق سۇيەك تابىلماعانى تاجىريبەمدە العاش رەت بولدى. سوعان قاراماستان كۇدىكتىنىڭ ءسوزى بويىنشا قىلمىس بولعان ورىندى انىقتادىق"، - دەدى ەرلان قۇسايىنوۆ.
قىلمىسكەر مەن مارقۇم ءبىر ۋنيۆەرسيتەتتە وقىعان جانە ءبىرىن-بىرى 2022 جىلدان بەرى بىلگەن. قىز-جىگىت رەتىندە قارىم-قاتىناستا بولعان. قاسكويلەر بۇرىن-سوڭدى سوتتى بولماعان، قانداي دا ءبىر ەسەپتە تۇرماعان. جەدەل ۋاكىلدىڭ ايىتۋىنشا، مۇنداي جاعدايلاردا ۇساق-تۇيەكتىڭ ءوزىن ەسكەرۋ ماڭىزدى.
"قىلمىس تىركەلگەن ۋاقىتتا جەدەل ۋاكىل ۇساق تۇيەك ءمان-جايلارعا نازار اۋدارادى. ونى ەسكەرمەسەڭ، قىلمىس اشىلماي قالۋى مۇمكىن. ادامنىڭ سويلەگەنىنە نازار اۋدارامىز. پسيحولوگيالىق جاعدايىنا ءمان بەرەمىز. كۇدىكتىنى سويلەتۋگە تىرىسامىز"، - دەيدى جەدەل ۋاكىل.
ءىىم مالىمەتىنشە، قىلمىس جاسالۋىنا يانانىڭ حايرجانوۆ باسقا قىزبەن كەزدەسىپ جۇرگەنىن جانە وعان ۇيلەنبەك ەكەنىن ءبىلىپ قويۋى، قالىڭدىعىنا شىندىقتى ايتامىن دەپ وقتالۋى تۇرتكى بولعان. تەرگەۋشىنىڭ ايتۋىنشا، باستى كۇدىكتى اۋەلدە تەرگەۋدى شاتاستىرۋعا تىرىسقان. الايدا ءتارتىپ ساقشىلارى تاكتيكانى وزگەرتىپ، قىلمىسكەردىڭ جاۋاپكەرشىلىكتەن جالتارۋىنا جول بەرمەگەن.
"سوت سانكسياسى بويىنشا ءبىز ولاردىڭ پاراقشالارىن تەكسەردىك. حات الماسۋ بارىسىندا ولار كىسى ءولتىرۋ جوسپارىن تالقىلاعان. سونداي-اق، عالامتورداعى ىزدەۋ جۇيەسىندە قازاقستاندا ادام ءولتىرۋ ءۇشىن قانداي جاۋاپكەرشىلىك قاراستىرىلاتىنى جانە بەينەباقىلاۋ كامەرالارىنداعى جازبالار قانشا ۋاقىت ساقتالاتىنى تۋرالى سۇراقتار بولعان"، - دەدى تەرگەۋشى تەمىرحان حاجمۇراتوۆ.
