Talǵar aýdanynda Sherzat Polattyń ólimine qatysty sot protsesi barysynda keibir adamdar el arasynda «Hýtorlyq Hasan» esimdi azamat pen onyń ainalasyndaǵy qylmystyq top týraly málimet aitqan bolatyn. Alaida Sherzatty óltirip, temir torǵa toǵytylǵandardyń ata-analary bastapqyda Hasandy múlde tanymaityndaryn aityp, ony eshqashan kórmegenderin dáleldeýge tyrysqan, dep habarlaidy Dalanews.kz.
«Ondai banda joq. Munyń bári ótirik sóz. Bul sózdi kim shyǵarǵanyn bilmeimin, Qarjaýbailar aitty ǵoi. Hýtorlyqtardyń bastyǵy Hasan dep. Osy jerde týyp ósken menmin ǵoi. Ondai bandy da joq. Hasan týraly eshteńe bilmeimiz. Qazir olar bul jaqta turmaidy», – dedi Nurqiias Iliiasovtyń ákesi Tóletbek Iliiasov.
Sot otyrystary kezinde de, odan buryn da Talǵarda «Hýtor» degen ataýmen tanylǵan toptyń turǵyndarǵa kúsh kórsetip, qoqan-loqy jasaǵany jaily málimetter taraǵan. Bul aqparat qoǵamda úlken rezonans týdyryp, áleýmettik jeliler men YouTube platformalarynda qyzý talqyǵa tústi.
«El daýysy» YouTube arnasyna bergen suhbattarynda sottalǵandardyń týystary jumyssyz qalǵandaryn aityp, Qarjaýbaidyń úiin órtegenderdi tabýdy, kinálilerdi jazalaýdy talap etti.
Buǵan deiin Hasandy múlde tanymaimyz dep málimdegen keibir ata-analar ýaqyt óte kele pikirlerin ózgertip, ony tipti batyr retinde kórsetkisi kelip, aqtap alýǵa tyrysyp baqty.
«Joq, buǵan deiin osy aýylda bandy bar ekenin estimedik. Osy aýylda turǵanyma 25 jyl boldy. Bul aýylda da úlken aqsaqaldar bar. Hasan degen esimdi men estigen joqpyn. Endi osy aýylda turǵan. Ol balanyń da jaqsylyqtaryn aityp jatyr. Qańtar kezinde osy Talǵardyń bir ǵimaratynyń terezesi synbady. Jan-jaqqa adam qoiyp, syrttan kelgen buzaqylardan aman saqtady», – dedi Azamat jáne Nurbol Toqtaýbaevtardyń anasy Aigúl Kemelbekova.
Aita keteiik, Hasan Qasymbaev 2024 jylǵy 2 qarashada ýaqytsha ustaý izoliatoryna qamalǵan bolatyn. Oǵan densaýlyqqa qasaqana aýyr ziian keltirý jáne adam urlaý boiynsha kúdik taǵylǵan. Bul qylmys 2021 jyldyń maýsym aiynda bolǵan. Keiin osy is boiynsha bes adam sottalyp, jazalaryn óteý oryndaryna jiberilgeni belgili boldy.
Keiin politsiia málimdeme jasap, Hasan Qasymbaevtyń ustalýy - Sherzattyń ólimine bailanysty emes ekenin habarlady.
PD málimetinshe, Qasymbaev 2 qarashada ustalyp, ýaqytsha ustaý izoliatoryna qamaýǵa alynǵan. Ol azamat Arman Alimovti urlap, densaýlyǵyna aýyr ziian keltirdi degen kúdikke ilingen.
Oqiǵa 2021 jyldyń maýsymynda bolǵan.
"Qazirgi ýaqytta qylmystyń barlyq mán-jaiyn jan-jaqty, tolyq jáne obektivti zertteýdi qamtamasyz etý úshin tergeý áreketteriniń kesheni júrgizilip jatyr. Is materialdary bultartpaý sharasyn sanktsiialaý úshin sotqa jiberildi", - dedi buǵan deiin Almaty oblystyq PD ókilderi.
Ermuhamet Ertisbaev aǵasy ákimdikte jumys istegen aýdanda Hasan Qasymbaevtyń tabysqa qalai kenelgenin quqyq qorǵaý organdary tekserýi kerek dep málimdedi.
