تالعار اۋدانىندا شەرزات پولاتتىڭ ولىمىنە قاتىستى سوت پروسەسى بارىسىندا كەيبىر ادامدار ەل اراسىندا «حۋتورلىق حاسان» ەسىمدى ازامات پەن ونىڭ اينالاسىنداعى قىلمىستىق توپ تۋرالى مالىمەت ايتقان بولاتىن. الايدا شەرزاتتى ءولتىرىپ، تەمىر تورعا توعىتىلعانداردىڭ اتا-انالارى باستاپقىدا حاساندى مۇلدە تانىمايتىندارىن ايتىپ، ونى ەشقاشان كورمەگەندەرىن دالەلدەۋگە تىرىسقان، دەپ حابارلايدى Dalanews.kz.

«ونداي باندا جوق. مۇنىڭ ءبارى وتىرىك ءسوز. بۇل ءسوزدى كىم شىعارعانىن بىلمەيمىن، قارجاۋبايلار ايتتى عوي. حۋتورلىقتاردىڭ باستىعى حاسان دەپ. وسى جەردە تۋىپ وسكەن مەنمىن عوي. ونداي باندى دا جوق. حاسان تۋرالى ەشتەڭە بىلمەيمىز. ءقازىر ولار بۇل جاقتا تۇرمايدى»، – دەدى نۇرقياس ءىلياسوۆتىڭ اكەسى تولەتبەك ءىلياسوۆ.

سوت وتىرىستارى كەزىندە دە، ودان بۇرىن دا تالعاردا «حۋتور» دەگەن اتاۋمەن تانىلعان توپتىڭ تۇرعىندارعا كۇش كورسەتىپ، قوقان-لوقى جاساعانى جايلى مالىمەتتەر تاراعان. بۇل اقپارات قوعامدا ۇلكەن رەزونانس تۋدىرىپ، الەۋمەتتىك جەلىلەر مەن YouTube پلاتفورمالارىندا قىزۋ تالقىعا ءتۇستى.

«ەل داۋىسى» YouTube ارناسىنا بەرگەن سۇحباتتارىندا سوتتالعانداردىڭ تۋىستارى جۇمىسسىز قالعاندارىن ايتىپ، قارجاۋبايدىڭ ءۇيىن ورتەگەندەردى تابۋدى، كىنالىلەردى جازالاۋدى تالاپ ەتتى.

بۇعان دەيىن حاساندى مۇلدە تانىمايمىز دەپ مالىمدەگەن كەيبىر اتا-انالار ۋاقىت وتە كەلە پىكىرلەرىن وزگەرتىپ، ونى ءتىپتى باتىر رەتىندە كورسەتكىسى كەلىپ، اقتاپ الۋعا تىرىسىپ باقتى.

«جوق، بۇعان دەيىن وسى اۋىلدا باندى بار ەكەنىن ەستىمەدىك. وسى اۋىلدا تۇرعانىما 25 جىل بولدى. بۇل اۋىلدا دا ۇلكەن اقساقالدار بار. حاسان دەگەن ەسىمدى مەن ەستىگەن جوقپىن. ەندى وسى اۋىلدا تۇرعان. ول بالانىڭ دا جاقسىلىقتارىن ايتىپ جاتىر. قاڭتار كەزىندە وسى تالعاردىڭ ءبىر عيماراتىنىڭ تەرەزەسى سىنبادى. جان-جاققا ادام قويىپ، سىرتتان كەلگەن بۇزاقىلاردان امان ساقتادى»، – دەدى ازامات جانە نۇربول توقتاۋبايەۆتاردىڭ اناسى ايگۇل كەمەلبەكوۆا.

ايتا كەتەيىك، حاسان قاسىمبايەۆ 2024 جىلعى 2 قاراشادا ۋاقىتشا ۇستاۋ يزولياتورىنا قامالعان بولاتىن. وعان دەنساۋلىققا قاساقانا اۋىر زيان كەلتىرۋ جانە ادام ۇرلاۋ بويىنشا كۇدىك تاعىلعان. بۇل قىلمىس 2021 جىلدىڭ ماۋسىم ايىندا بولعان. كەيىن وسى ءىس بويىنشا بەس ادام سوتتالىپ، جازالارىن وتەۋ ورىندارىنا جىبەرىلگەنى بەلگىلى بولدى.

كەيىن پوليسيا مالىمدەمە جاساپ، حاسان قاسىمبايەۆتىڭ ۇستالۋى - شەرزاتتىڭ ولىمىنە بايلانىستى ەمەس ەكەنىن حابارلادى.

پد مالىمەتىنشە، قاسىمبايەۆ 2 قاراشادا ۇستالىپ، ۋاقىتشا ۇستاۋ يزولياتورىنا قاماۋعا الىنعان. ول ازامات ارمان ءاليموۆتى ۇرلاپ، دەنساۋلىعىنا اۋىر زيان كەلتىردى دەگەن كۇدىككە ىلىنگەن.

وقيعا 2021 جىلدىڭ ماۋسىمىندا بولعان. 

"قازىرگى ۋاقىتتا قىلمىستىڭ بارلىق ءمان-جايىن جان-جاقتى، تولىق جانە وبەكتيۆتى زەرتتەۋدى قامتاماسىز ەتۋ ءۇشىن تەرگەۋ ارەكەتتەرىنىڭ كەشەنى جۇرگىزىلىپ جاتىر. ءىس ماتەريالدارى بۇلتارتپاۋ شاراسىن سانكسيالاۋ ءۇشىن سوتقا جىبەرىلدى"، - دەدى بۇعان دەيىن الماتى وبلىستىق پد وكىلدەرى. 

ەرمۇحامەت ەرتىسبايەۆ اعاسى اكىمدىكتە جۇمىس ىستەگەن اۋداندا حاسان قاسىمبايەۆتىڭ تابىسقا قالاي كەنەلگەنىن قۇقىق قورعاۋ ورگاندارى تەكسەرۋى كەرەك دەپ مالىمدەدى.