Reseidegi dron shabýyldary kúsheigennen keiin iri kompaniialardyń logistikalyq baǵyttaryn qaita qaraýy múmkin ekenin buǵan deiin Protenge Telegram arnasy jazǵan bolatyn. Endi bul boljamnyń shyndyqqa ainala bastaǵany baiqalady, dep habarlaidy dalanews.kz.
«Kommersant» basylymynyń málimetinshe, Wildberries Qazaqstannan jalpy kólemi 100 myń sharshy metrge deiin bolatyn qoima izdep jatyr. Kompaniia zamanaýi qoima keshenderiniń basym bóligin jalǵa alýǵa daiyn. Sondai-aq marketpleis satýshylardyń taýarlarynyń bir bóligin Reseiden Qazaqstanǵa kóshirýdi josparlap otyr.
Buǵan Reseidegi logistikalyq nysandarǵa jasalǵan jappai dron shabýyldary sebep bolǵan. 18 shildeden beri Sankt-Peterbýrg, Máskeý oblysy, Qyrym, Tambov, Voronej oblystary, sondai-aq Stavropol jáne Krasnodar ólkelerindegi qoimalar zardap shekken. Sonyń saldarynan jalpy aýmaǵy 444 myń sharshy metrden asatyn qoima paidalanýdan shyqqan. «Kommersanttyń» baǵalaýynsha, bul Wildberries logistikalyq infraqurylymynyń shamamen 8 paiyzyna teń.
Sonymen qatar kompaniia Qazaqstanda eki iri logistikalyq ortalyqtyń qurylysyn júrgizip jatyr. Onyń biri Almatyda ornalasady jáne aýmaǵy 100 myń sharshy metrden asady. Al Astanadaǵy logistikalyq ortalyqtyń kólemi 160 myń sharshy metrdi quraidy. Ony kelesi jyly paidalanýǵa berý josparlanǵan.
Sarapshylardyń pikirinshe, iri biznes logistikany táýekeli joǵary óńirlerde shoǵyrlandyrmai, birneshe elge bólip ornalastyrýǵa kóship jatyr. Qazaqstan úshin bul jańa júk aǵyndaryn tartýǵa, investitsiia kólemin ulǵaitýǵa jáne qoima infraqurylymyn damytýǵa múmkindik berýi múmkin.
Al tutynýshylar úshin munyń taǵy bir jaǵymdy tusy bolýy yqtimal — jetkizý merzimi qysqaryp, tasymal shyǵyndary da tómendeýi múmkin degen úmit bar.
