Úzdik ýchaskelik politsei!
Batyrbek Rústemuly er azamat bolǵasyn, ekinshiden qoǵamdyq tártipke bei-jai qarai almaǵandyqtan, bolashaqta IIO-da qyzmet etemin dep belin bekem býady. Osy maqsatta, QR IIM-niń Qostanai orta arnaýly Zań kolledjine oqýǵa túsedi. Stýdenttik ómiri bastalyp, talai myqty oqytýshylardan dáris alyp, ózine ómirlik azyq bolar sabaqtar alady. 1996 jyly oqý ornyn bitirip, aýylyna Zańger mamandyǵyn alyp keledi. Qiialyndaǵy armanyna jetýge qolyndaǵy diplomy jol ashady. Osylaisha, politsei bolýdy maqsat tutqan azamat, armanyna jetip, jumysqa ornalasady.
Alǵashqy eńbek jolyn 1996-1997 jyldar aralyǵynda Jambyl oblysy Jańatas qalasynda ýchaskelik politsei laýazymymen bastaidy. Ýchaskelik politsiia inspektorynyń negizgi mindetteriniń biri – ol "adamdardyń ómir súrý sapasyn" jaqsartýǵa yqpal etý, qalypty qoǵamdyqdyń tártipti nyǵaityp, paidaly qyzmet múmkindigin qamtamasyz etý, olardyń ómir súrý jaǵdaiyn "áleýmettik" aýyrpalyqtardan tazartyp, quqyq buzýshylyqtyń aldyn-alý bolyp tabylady.
Jas maman ózine berilgen aimaqtar boiynsha, ózine mindettelgen erejege sai jumys jasaidy. Odan ary qyzmet babymen Kentaý qalasyna aýysady. 1997-2001 jyldar aralyǵynda Kentaý QPB-nyń jedel ýákili laýazymynda qyzmet etti. Munda da jas politsei talai qylmystardyń aldyn alyp, izin sýytpai ashýda abyroily eńbek etip, qatarlastarynyń arasynan daralanyp turdy. 5 jylǵa jýyq Kendi Kentaý qalasynda qyzmet etip, 2001-2008 jyldary Saryaǵash APB-na JV PPT komandir vzvodynyń orynbasary laýazymyna taǵaiyndaldy. 2008 jyldan bastap qazirgi kúnge deiin Saryaǵash APB-nyń ýchaskelik inspektor laýazymynda tabysty eńbek etýde. Olai deýimizge dálel retinde Batyrbek Eraliev 2012 jyly oblys boiynsha «Úzdik ýchaskelik politsiia inspektory» ataǵyn jeńip alǵan.
Qiyndyǵy men qaýiptiligi qatar júretin qyzmette politseiler talai qylmyskerlermen betpe-bet kelýge týra keledi. Zańsyz áreket jasaityn azamattarmen jumys jasaý ońai emes. Únemi qalypta bolý úshin, psihologiiań myqty bolyp, sportpen turaqty túrde ainalysyp otyrý kerek. Sol sebepti keiipkerimiz ishki sezimderin baqylai alatyn, sportty serik etken politsei. Jumysynyń jeńil emesin jete túsingen Batyrbek Rústemuly kásibi sheberligin jyl saiyn arttyryp, qyraǵylyq pen jyldam áreket etýdi kúndelikti jumysqa kelgeninde oiynan shyǵarmaidy. «Túrli deńgeidegi qylmystardy jasap, qylmysker atanatyndar tek aqyl-oiy tolysqan ákki, úlken jastaǵy azamattar ǵana emes», -deidi keiipkerimiz. «Búginde jasóspirimder iaǵni kámelet jasyna tolmaǵan oqýshylardyń qylmysqa beiimdiligi artqan. Oǵan dálel retinde jumys barysynda oryn alǵan jaitty aityp ótsem. Mektep oqýshysy túngi ýaqytta ózi bilim alyp júrgen mektepke kelip, qulybyn buzyp kirip, 10 000 teńge men noýtbýkty jasyryn urlap ketedi. Tańerteń mektepke kelgen ujym urlyq bolǵanyn kórip, dereý jergilikti tártip saqshylaryna habar beredi. Al, biz kelgen aryz boiynsha tiianaqty túrde tergeý júrgizip, kúdiktini ustadyq. Ókinishtisi sol, ury dep otyrǵanymyz – mekteptiń 8-synyp oqýshysy. Osy tusta ata-analarǵa aityp ketsem, balańyzdy únemi baqylaýda ustańyz, kimmen aralasatynyn qadaǵalańyz, jaqsy jaǵynan tárbie berińiz. Qalai baptasańyz, solai ósetinin esten shyǵarmańyz. Balamyzdyń jaqsy azamat bolyp qalyptasýy siz ben biz úshin, jalpy qoǵam úshin bailyq der edim. Aita bersem, mundai jaittar 23 jyldyq qyzmetimde kóp kezdesedi» deidi Batyrbek Rústemuly.
Keiipkerimizdiń qyzmette abyroily bolýy ata-anasynyń eńbegi. Otbasynda naǵyz er azamat etip tárbielegeniniń arqasynda ujymynda syily, jumysy eleýli. Osyndai arda ulǵa tárbie bergen ákesi – Eraliev Rústembek, kezinde keńsharda meńgerýshi bolyp qyzmet atqarǵan. Al, anasy – Mombekova Bibaisha Qondybaiqyzy – fermada qarapaiym jumysshy bolǵan. 5 balany baǵyp-qaǵyp ósirgen ata-anasy aýyldaǵy úlgili, kópbalaly otbasylardyń aldyńǵy qatarynda bolǵan. Bir qýantarlyǵy, «Aǵasy bardyń jaǵasy bar, inisi bardyń tynysy bar» degendei, aǵadan tálim alǵan inisi, Eraliev Dastanda búginde politsei bolyp qyzmet atqarýda, sheni serjant.
Ósip-óngen januiadan shyqqan Batyrbek óz otbasyn Dilia Saridovamen quryp, búginde 1 qyz, 2 ul tárbielep otyrǵan asyl áke. Keiipkerimiz qyzmetine bailanysty otbasynyń janynda bolýǵa kóp múmkindik bolmasada, bos ýaqyt bola qalsa, ony bala tárbiesine arnaýǵa tyrysady eken. «Politsei bolý – óte jaýapkershiligi mol jumys bolsa da, jolymdy qýamyn dese, shynaiy politsei bolýdy qalasa uldaryma da, qyzyma da qarsylyq bildirmeimin. Eń bastysy júrekpen qalasa bolǵany. Tek formaǵa qyzyqpai, eldiń tynyshtyǵy men qoǵamdyq qaýipsizdigin qalyptastyrýǵa kishkene de bolsa, úles qosamyz dese, bar bilgenimdi úiretip, jol kórsetýge daiynmyn»,- dep aǵynan jaryldy tájiribeli tártip saqshysy.
Otbasynda ardaqty áke, asyl jar, ata-anasyna, baýyrlaryna súiikti ul, qarapaiymdylyǵymen dostaryna syily bolǵan Batyrbektei azamattyń ómirlik-qyzmettik joly ózgelerge úlgi bolary sózsiz! Kúnde jumysqa shyǵarda ózin ne tosyp turǵanyn bilmeitin politsei bolý – naǵyz batyrdyń isi! Sondyqtan tańdaýy osy salaǵa túsken, shirek ǵasyrǵa jýyq qyzmet etken azamattyń otbasyna amandyq, «Qazaqstan Politsiiasy kúni» qarsańynda jumysyna tabys tileimiz!
