Qazaqstanda áýe jolaýshylarynyń quqyqtaryn qorǵaý kúsheitilýi múmkin, dep habarlaidy Dalanews.kz.
Qazaqstanda áýe jolaýshylarynyń quqyqtaryn qorǵaýǵa baǵyttalǵan mańyzdy ózgerister talqylanyp jatyr. Májilis depýtaty Murat Ábenovtiń aitýynsha, 2020 jyly qabyldanǵan birqatar normalar aviakompaniialardyń múddesin ǵana qorǵap, jolaýshylardy tańdaý quqyǵynan aiyrǵan.
Atap aitqanda, "qaitarylmaityn bilet" uǵymy zańda bekitilip, bilettiń baǵasyna qaramastan, qarajatty qaitarmaýǵa múmkindik berildi. Sonymen qatar, áýe kompaniialaryna qatysty tutynýshylardyń shaǵymdary tekserýge negiz bola almaityn. Bul sala is júzinde memlekettik baqylaýdan tys qaldy.
Alaida qoǵamdyq talqylaýlar nátijesinde 2023 jyly ázirlengen jańa zań jobasynan bul normalar alynyp tastaldy. Joba Úkimet pen Prezident Ákimshiliginiń qoldaýyna ie bolǵanymen, áli kúnge deiin salalyq lobbisterdiń qarsylyǵyna bailanysty toqtap tur.
Jaqynda depýtat áýe jolaýshylarynyń quqyqtary boiynsha Kólik ministri Nurlan Saýranbaevpen kezdesken. Kezdesý barysynda ministr azamattardyń múddesin qorǵaýǵa baǵyttalǵan birqatar usynysty qoldaǵan. Olardyń qatarynda:
– naqty jeńildikpen satylǵan biletterge ǵana shekteýli aiyppul qoldaný;
– overbýking úshin jolaýshylarǵa ótemaqy tóleý;
– reis keshikken jaǵdaida biletti aiyppulsyz qaitarý;
– vaýcherlerden tolyq bas tartyp, aqshany 7 kún ishinde qaitarý;
– reis keshigýi men qyzmet sapasyna avtomatty ótemaqy engizý bar.
Murat Ábenovtiń aitýynsha, maqsat – tyiym salý emes, aviakompaniialardyń jaýapkershiligin arttyrý jáne jolaýshynyń naqty tańdaý quqyǵyn qamtamasyz etý. Qazirgi tańda zań jobasynyń sońǵy nusqasy pysyqtalyp jatyr. Qujatty osy kóktemde qabyldaý josparlanǵan.
