17 qańtarda Qazaqstan Respýblikasy Ulttyq Bankiniń Aqsha-kredit saiasaty komiteti bazalyq mólsherlemeni +/- 1 p.t. dálizimen jyldyq 15,25% deńgeiinde belgileý týraly sheshim qabyldady, dep jazady Dalanews.kz.
Bank taratqan aqpatqa sáikes, jeltoqsan aiynda Qazaqstanda infliatsiia 8,6%-ǵa deiin údep, 2024 jylǵa boljanǵan 8-9% diapazon sheginde qalyptasty.
"Qyzmetter baǵasynyń joǵary ósýi jáne tamyzdan bastap baiqalyp otyrǵan azyq-túlikke jatpaityn taýarlar infliatsiiasynyń jedeldeýi onyń dinamikasyna kóptep úles qosty. "Tarifti investitsiiaǵa aiyrbastaý" baǵdarlamasyn iske asyrý men teńgeniń álsireýi aiasynda infliatsiia kúsh alyp tur. Sonymen qatar infliatsiianyń ornyqty bóliginde ósim saqtalyp otyr. Ol fiskaldyq yntalandyrý jalǵasqandyqtan suranys tarapynan qysym baryn kórsetedi. Jeltoqsan aiynda halyqtyń infliatsiialyq kútýleri, joǵary qubylmalylyqty kórsetip, qaita ósti", delingen habarlamada.
Álemdik azyq-túlik baǵasynyń joǵary bolýyna jáne Reseide infliatsiianyń qarqyn alýyna bailanysty syrtqy infliatsiialyq qysym joǵary bolyp turǵany da naqtylanady.
"Damyǵan ekonomikalarda infliatsiia sońǵy ailarda uzaqqa jalǵasqan tómendeý kezeńinen keiin birshama ósti. Ornyqty infliatsiia jáne kúshti eńbek naryǵy uzaq ýaqyt boiy qatań syrtqy monetarlyq talaptardyń saqtalýyna áser etýi yqtimal. Máselen, AQSh FRJ qyrkúiek aiyndaǵy baǵalaýmen salystyrǵanda mólsherlemeler baiaý tómendeidi dep kútedi", delingen retteýshi organ boljamynda.
2024 jyldyń qorytyndysy boiynsha qysqamerzimdi ekonomikalyq indikatordyń ósýi j/j 6,2%-ǵa deiin jedeldedi. Bul ekonomikanyń artyq óskenin kórsetetin belgi bolýy múmkin. Barlyq negizgi salada óndiris artqany baiqalady. Aýyl sharýashylyǵy, qurylys, saýda jáne kólik salalary jaqsy ósim kórsetti. Sonymen qatar óńdeý ónerkásibinde dinamika táýir qarqyn alǵany baiqalady.
Ishki suranys usynys múmkindikterinen asyp túsedi jáne belsendi fiskaldyq yntalandyrýǵa, aqshalai kiristerdiń ósýine, sondai-aq shikizatqa jatpaityn sektordaǵy investitsiialardyń keńeiýine bailanysty ornyqty túrde joǵary qalyp tur. Ony bólshek saýda men tutynýshylyq kreditteýdiń óskeni rastaidy. Ulttyq Bank baqylap otyrǵan iskerlik belsendilik indikatory 11 ai qatarynan oń kórsetkish kórsetti.
Ulttyq banktiń málimetinshe, infliatsiialyq táýekelder saqtalyp otyr.
"Syrtqy ortadan – olar Reseidegi infliatsiianyń joǵarylaýyna bailanysty, al ishki ortadan – retteletin baǵalar salasyndaǵy reformanyń jalǵasýyna, álsiregen teńgeniń baǵalarǵa áser etýine, fiskaldyq yntalandyrý, turaqsyz infliatsiialyq kútýler jáne tutynýshylyq kreditteýdiń ósýi kezindegi joǵary ishki suranysqa bailanysty", delingen habarlamada.
Aiyrbastaý baǵamynyń álsireýi, infliatsiialyq kútýlerdiń jedeldeýi, sondai-aq infliatsiianyń naqty dinamikasynyń ósýi aiasynda jiyntyq aqsha-kredit sharttary birshama jeńildedi. Osyǵan bailanysty negizgi makroekonomikalyq kórsetkishterdiń boljamy jańartylatyn kelesi sheshimde Komitet infliatsiiany 5%-dyq targetke qarai ornyqty túrde tómendeý traektoriiasyna qaitarý úshin aqsha-kredit saiasatyn qosymsha qatańdatý qajettiligin anyqtaidy.
Ulttyq banktiń bazalyq mólsherleme boiynsha kezekti josparly sheshimi 2025 jylǵy 7 naýryzda Astana qalasynyń ýaqytymen saǵat 12:00-de jariialanady.
Buǵan deiin Halyk Finance Ulttyq banktiń bazalyq mólsherlemeniń qazirgi deńgeiin saqtap qalatynyn boljaǵan edi.
