Belgili sport jýrnalisi Aslan Qajenov Astanadaǵy ippodromnyń jekemenshikke ótýine qatysty jazbasynan keiin ózine túrli qońyraýlar túse bastaǵanyn málimdedi, dep habarlaidy dalanews.kz.
Jýrnalistiń aitýynsha, ázirge oǵan eshkim qoqan-loqy kórsetpegen, alaida eskertý sipatyndaǵy habarlamalar kóbeigen.
«Keshe elordadaǵy ippodromnyń tehnichno jekege ótip ketkenin jazǵan edim. Sodan keiin túrli qońyraýlar kelip jatyr. Qorqytý-úrkitý emes. Ázirge eskertý», – dep jazdy ol áleýmettik jelidegi paraqshasynda.
Buǵan deiin Aslan Qajenov Astanadaǵy ippodromnyń jekemenshikke ótkenin jáne osydan keiin qyzmet qunynyń kúrt óskenin aitqan bolatyn. Onyń málimetinshe, kókpardan ulttyq quramanyń oqý-jattyǵý jiynyn ótkizý úshin qorany jalǵa alý quny 12,3 million teńgege deiin kóterilgen. Al buǵan deiin bul qyzmetter memlekettik nysan bolǵandyqtan tegin kórsetilip kelgen.
Jýrnalist jańa jazbasynda taǵy bir máselege nazar aýdardy. Onyń aitýynsha, jekemenshikke ótken ippodromdy kútip-ustaýǵa jyl saiyn shamamen 600 million teńge bólinedi.
«Mendegi aqparat boiynsha, jekege ótip ketken ippodromdy kútip-ustaýǵa jyl saiyn 600 million teńgeden bólinedi. Qala ákimdiginen, iaǵni siz ben bizdiń salyǵymyzdan. Ony qalai túsinýge bolady?» – dedi ol.
Sondai-aq Qajenov ippodromdy kezinde ERG kompaniiasy salyp bergenin, keiin ákimdik ony shamamen 15-16 milliard teńgege satyp alǵanyn alǵa tartty. Onyń sózinshe, endi nysannyń qaitadan jekemenshikke berilýi qoǵamda kóptegen suraq týǵyzýda.
Jýrnalist memlekettik qarajatqa salynǵan jáne qoǵamdyq igilik retinde paidalanylǵan nysannyń qandai sharttarmen jekemenshikke ótkenin túsindirý qajet dep esepteidi.
Ázirge Astana ippodromynyń menshik quqyǵynyń ózgerýine qatysty resmi organdar tarapynan túsinikteme berilgen joq.
