Búgin Qazaqstan Ulttyq banki 2026 jyldaǵy bazalyq mólsherlemege qatysty alǵashqy sheshimin jariia etedi. Qarjy naryǵy men halyq arasynda «protsenttik saiasat biyl qai baǵytqa bet alady?» degen saýal kún tártibinde tur, dep habarlaidy Dalanews.kz.
Ótken jyldaǵy jaǵdai
«Qarjyly saýat» sarapshylarynyń málimetinshe, 2025 jyldyń sońynda Ulttyq bank bazalyq mólsherlemeni 18 paiyz deńgeiinde saqtap qalý týraly sheshim qabyldaǵan.
Mundai qadamǵa infliatsiianyń joǵary bolýy negizgi sebep boldy. Baǵanyń ósý qarqyny baiaýlaǵanymen, turaqty tómendeý baiqalmady.
Kommýnaldyq tarifterge ýaqytsha ákimshilik shekteýler engizilgen kezeńde infliatsiia sál báseńdegenimen, kúndelikti tutynatyn azyq-túlik pen taýarlar qymbattaýyn toqtatpaǵan.
Infliatsiialyq qysym nege saqtaldy?
Sarapshylar birneshe negizgi faktordy atap ótedi:
Infliatsiialyq kútýlerdiń joǵary bolýy. Halyq arasynda «baǵa báribir ósedi» degen túsinik qalyptasty. Bul óz kezeginde infliatsiiany kúsheitetin psihologiialyq faktor sanalady.
Ishki suranystyń artýy. El ishinde aqsha ainalymy joǵary deńgeide qaldy.
Otandyq óndiristiń jetkiliksizdigi. Ishki naryqtaǵy suranys tolyqtai jabylmai, importqa táýeldilik saqtaldy.
Syrtqy ekonomikalyq ahýal. Álemdegi geosaiasi shielenis, saýda qaqtyǵystary men azyq-túlik baǵasynyń jahandyq qymbattaýy da Qazaqstandaǵy infliatsiiaǵa qysym túsirdi.
Ulttyq banktiń ustanymy qandai boldy?
Ulttyq bank basshylyǵy 2025 jylǵy qarasha aiyndaǵy málimdemesinde osy faktorlarǵa toqtalyp, 2026 jyldyń birinshi jartysyna deiin bazalyq mólsherlemeni tómendetýge negiz kórip otyrmaǵanyn aitqan edi.
Sondai-aq infliatsiia baiaýlamaityn jaǵdaida protsenttik saiasatty odan ári qatańdatý múmkin ekenin de joqqa shyǵarmaǵan.
Búgin ne belgili bolady?
Búgin Ulttyq bank infliatsiiaǵa qatysty jańartylǵan derekterdi usynyp, sol negizde bazalyq mólsherleme boiynsha sheshimin jariialaýy tiis.
Qarjy naryǵy myna suraqtardyń jaýabyn kútýde:
infliatsiia qarqyny baiaýlady ma?
Ulttyq bank byltyrǵy qatań ustanymyn ózgerte me?
álde 18 paiyzdyq mólsherleme saqtala ma?
Bul saýaldardyń jaýaby búgin belgili bolady.
Ulttyq bank bazalyq mólsherleme boiynsha jylyna 8 ret sheshim qabyldaidy. Búgingi sheshim — 2026 jylǵy alǵashqy paiyzdyq saiasat málimdemesi bolmaq.
Material «Qarjyly saýat» saraptamalyq arnasynyń derekterine súiene otyryp daiyndaldy.
