بۇگىن قازاقستان ۇلتتىق بانكى 2026 جىلداعى بازالىق مولشەرلەمەگە قاتىستى العاشقى شەشىمىن جاريا ەتەدى. قارجى نارىعى مەن حالىق اراسىندا «پروسەنتتىك ساياسات بيىل قاي باعىتقا بەت الادى؟» دەگەن ساۋال كۇن تارتىبىندە تۇر، دەپ حابارلايدى Dalanews.kz.
وتكەن جىلداعى جاعداي
«قارجىلى ساۋات» ساراپشىلارىنىڭ مالىمەتىنشە، 2025 جىلدىڭ سوڭىندا ۇلتتىق بانك بازالىق مولشەرلەمەنى 18 پايىز دەڭگەيىندە ساقتاپ قالۋ تۋرالى شەشىم قابىلداعان.
مۇنداي قادامعا ينفلياسيانىڭ جوعارى بولۋى نەگىزگى سەبەپ بولدى. باعانىڭ ءوسۋ قارقىنى باياۋلاعانىمەن، تۇراقتى تومەندەۋ بايقالمادى.
كوممۋنالدىق تاريفتەرگە ۋاقىتشا اكىمشىلىك شەكتەۋلەر ەنگىزىلگەن كەزەڭدە ينفلياسيا ءسال باسەڭدەگەنىمەن، كۇندەلىكتى تۇتىناتىن ازىق-تۇلىك پەن تاۋارلار قىمباتتاۋىن توقتاتپاعان.
ينفلياسيالىق قىسىم نەگە ساقتالدى؟
ساراپشىلار بىرنەشە نەگىزگى فاكتوردى اتاپ وتەدى:
ينفلياسيالىق كۇتۋلەردىڭ جوعارى بولۋى. حالىق اراسىندا «باعا ءبارىبىر وسەدى» دەگەن تۇسىنىك قالىپتاستى. بۇل ءوز كەزەگىندە ينفلياسيانى كۇشەيتەتىن پسيحولوگيالىق فاكتور سانالادى.
ىشكى سۇرانىستىڭ ارتۋى. ەل ىشىندە اقشا اينالىمى جوعارى دەڭگەيدە قالدى.
وتاندىق ءوندىرىستىڭ جەتكىلىكسىزدىگى. ىشكى نارىقتاعى سۇرانىس تولىقتاي جابىلماي، يمپورتقا تاۋەلدىلىك ساقتالدى.
سىرتقى ەكونوميكالىق احۋال. الەمدەگى گەوساياسي شيەلەنىس، ساۋدا قاقتىعىستارى مەن ازىق-تۇلىك باعاسىنىڭ جاھاندىق قىمباتتاۋى دا قازاقستانداعى ينفلياسياعا قىسىم ءتۇسىردى.
ۇلتتىق بانكتىڭ ۇستانىمى قانداي بولدى؟
ۇلتتىق بانك باسشىلىعى 2025 جىلعى قاراشا ايىنداعى مالىمدەمەسىندە وسى فاكتورلارعا توقتالىپ، 2026 جىلدىڭ ءبىرىنشى جارتىسىنا دەيىن بازالىق مولشەرلەمەنى تومەندەتۋگە نەگىز كورىپ وتىرماعانىن ايتقان ەدى.
سونداي-اق ينفلياسيا باياۋلامايتىن جاعدايدا پروسەنتتىك ساياساتتى ودان ءارى قاتاڭداتۋ مۇمكىن ەكەنىن دە جوققا شىعارماعان.
بۇگىن نە بەلگىلى بولادى؟
بۇگىن ۇلتتىق بانك ينفلياسياعا قاتىستى جاڭارتىلعان دەرەكتەردى ۇسىنىپ، سول نەگىزدە بازالىق مولشەرلەمە بويىنشا شەشىمىن جاريالاۋى ءتيىس.
قارجى نارىعى مىنا سۇراقتاردىڭ جاۋابىن كۇتۋدە:
ينفلياسيا قارقىنى باياۋلادى ما؟
ۇلتتىق بانك بىلتىرعى قاتاڭ ۇستانىمىن وزگەرتە مە؟
الدە 18 پايىزدىق مولشەرلەمە ساقتالا ما؟
بۇل ساۋالداردىڭ جاۋابى بۇگىن بەلگىلى بولادى.
ۇلتتىق بانك بازالىق مولشەرلەمە بويىنشا جىلىنا 8 رەت شەشىم قابىلدايدى. بۇگىنگى شەشىم — 2026 جىلعى العاشقى پايىزدىق ساياسات مالىمدەمەسى بولماق.
ماتەريال «قارجىلى ساۋات» ساراپتامالىق ارناسىنىڭ دەرەكتەرىنە سۇيەنە وتىرىپ دايىندالدى.
