Qazaqstanda keıbir sottalǵandarǵa mekeme aýmaǵynan tys jerde smartfon paıdalanýǵa ruqsat berý usynyldy. İshki ister mınıstrligi tıisti buıryq jobasyn "Ashyq NQA" portalynda jarıalap, ony qoǵamdyq talqylaýǵa shyǵardy, dep habarlaıdy Dalanews.kz.
Usynylyp otyrǵan ózgerister tek qaýipsizdigi eń tómen kolonıalar qatysty qabyldanýy múmkin. Jobaǵa sáıkes, sottalǵandarǵa mekemeden tys ýaqytta smartfon qoldanýǵa múmkindik berý kózdelip otyr. Sonymen qatar úshinshi oń minez-qulyq dárejesi bar sottalǵandar úshin "tynysh saǵat" engizý usynylady. Budan bólek, kezdesýge jazylý jáne qalaǵa shyǵýǵa ruqsat alý qyzmetin arnaıy termınaldar arqyly rásimdeý tetigi qarastyrylǵan. Mınıstrlik bul bastamalar sybaılas jemqorlyq táýekelderin azaıtyp, prosesterdiń ashyqtyǵyn arttyrýǵa yqpal etedi dep esepteıdi.
Buıryq jobasy 11 naýryzǵa deıin qoǵamdyq talqylaýda bolady. Osy merzim ishinde azamattar óz usynys-pikirlerin bildire alady.
Aıta keteıik, qaýipsizdigi eń tómen mekemelerde negizinen abaısyzda qylmys jasaǵandar jáne alǵash ret jeńil ne ortasha aýyrlyqtaǵy quqyq buzýshylyq úshin sottalǵandar jazasyn óteıdi. Mundaı kolonıa-poselenıelerde oqshaýlaý deńgeıi tómen: sottalǵandarǵa azamattyq kıim kıýge, otbasymen birge turýǵa jáne mekemeden tys jerde jumys isteýge ruqsat beriledi.
